ئەتىگەندە ئورنىڭىزدىن تۇرۇپلا «سۇ ئىچىپ» بۆرىكىڭىزنى نابۇت قىلماڭ!

بىر كېچە ئۇخلىغاندىن كېيىن، بەدىنىمىزدىكى سۇ تەركىبى ئازلاپ كېتىدۇ، ئەتىگەندە ئورنىدىن تۇرغاندىن كېيىن دەرھال سۇ ئىچىش، ئورگانىزمنىڭ مېتابولىزمىدا ئېقىپ كەتكەن سۇ تەركىبىنى تولۇقلاپ، قاننىڭ يېپىشقاقلىقىنى تۆۋەنلىتىپ، قان ئايلىنىشنى تەڭشەيدۇ.

ئەتىگەندە سۇ ئىچىش سالامەتلىككە پايدىلىق بولسىمۇ، ئەمما سۇ ئىچىش ئۇسۇلى توغرا بولمىسا، بەدىنىمىزگە زىيان يەتكۈزىدۇ. بولۇپمۇ سۇنى بەك كۆپ، بەك تېز ئىچسە، يۈرەككە تەسىر قىلىدۇ، سالامەتلىككە پايدىسىز.

ئەتىگەندە سۇنى كۆپ ئىچكەندە، قىسقا ۋاقىت ئىچىدە قاننى سۇيۇلدۇرۇپ، يۈرەكنىڭ يۈكىنى ئېغىرلاشتۇرۇۋېتىدۇ. ئۇنىڭ ئۈستىگە سەھەردە يۈرەك مۇسكۇل تىقىلمىسى كۆپ يۈز بېرىدىغان مەزگىل بولغاچقا، سۇ بەك تېز ئىچىلسە، يۈرەكنىڭ نورمال ھەرىكىتىگە ئېغىر تەسىر يېتىپ، «ئىش تاشلاش»نى كەلتۈرۈپ چىقىرىدۇ. ئۇنىڭ ئۈستىگە ئەتىگەندە سۇ زىيادە كۆپ قوبۇل قىلىنسا، ئاشقازان كىسلاتاسى سۇيۇلۇپ، ئەتىگەنلىك تاماقنىڭ ھەزىم بولۇشىغا تەسىر يېتىپ، ھەزىم قىلىش ناچارلىشىشنى كەلتۈرۈپ چىقىرىدۇ.

تەكلىپ: ئەتىگەندە ئورنىدىن تۇرغاندىن كېيىن، ئاچ قورساققا مۇۋاپىق مىقداردا سۇ ئىچكەن ياخشى، ئەڭ ياخشىسى 150 مىللىلېتىردىن (تەخمىنەن يېرىم ئىستاكان سۇ) ئېشىپ كەتمەسلىكى، سۇ ئىچكەندە بەك تېز بولۇپ كەتمەسلىكى كېرەك.

سۇ ئىچىش ئۇسۇلىدىن باشقا، قانداق سۇ ئىچىشمۇ ئىنتايىن مۇھىم. ئەتىگەندە ئىچكەن تۇنجى ئىستاكان سۇنى توغرا تاللىمىغاندا، بۆرەكنى زەخىملەندۈرۈپلا قالماي، قان تومۇرلارغا بولغان ئەكس تەسىرىمۇ ناھايىتى چوڭ بولىدۇ. ئۇنداقتا، مېۋە شەربىتى، سۈت، قايناق سۇ، ھەسەل سۈيى.... قانداق سۇ ماس كېلىدۇ؟ تۆۋەندە بىز بىرلىكتە كۆرۈپ باقايلى.

1. كالا سۈتى، مېۋە شەربىتى

كالا سۈتى بىلەن مېۋە شەربىتىنىڭ ھەممىسى كالورىيەلىك بولىدۇ، بولۇپمۇ كالا سۈتى تەركىبىدە ئاقسىل مول بولۇپ، ئىستېمال قىلغاندىن كېيىن، ئاشقازان-ئۈچەيدە سۇ كەمچىل بولغان ئەھۋالدا، ئاشقازان-ئۈچەينىڭ مېتابولىزمىغا پايدىسىز. مېۋە شەربىتى ئىچكەندە، بەدەندىكى ھۈجەيرىلەرنىڭ ئوسموس بېسىمىغا تەسىر كۆرسىتىپ، سۈيدۈكنى راۋانلاشتۇرۇش رولىنى ئوينايدۇ. مېۋە شەربىتى گەرچە ئاشقازان-ئۈچەينىڭ بەدەندىكى «ئەخلەت»لەرنى چىقىرىپ تاشلىشىغا ياردەم بەرسىمۇ، لېكىن بەدەننى تېخىمۇ سۇسىزلاندۇرىدۇ.

2. تۇزلۇق سۇ

كېچىدە تاماق يېمىگەندە، ئاشقازاننىڭ ھەزىم قىلىش ئىقتىدارى غىدىقلانمايدۇ، ئاشقازان سۇيۇقلۇقىمۇ بىر قەدەر قويۇقلىشىدۇ، بۇ ۋاقىتتا ئىلمان قايناق سۇ ياكى تۇزلۇق سۇ (قايناقسۇغا ئازراق تۇز سېلىنغان سۇ) ئىچىش ئاشقازان سۇيۇقلۇقىنى سۇيۇلدۇرۇشقا پايدىلىق، شۇنىڭ بىلەن بىر ۋاقىتتا ئاشقازان-ئۈچەينىڭ لۆمۈلدەش ئىقتىدارىنى غىدىقلاپ، داۋاملىق ناشتا قىلىش، ھەرىكەت قىلىش قاتارلىقلارغا پايدىلىق.

3. ھەسەل سۈيى

ھەسەل تەركىبىدە نىسبەتەن كۆپ ئوزۇقلۇق تەركىب بار. قەۋزىيەت ئالامىتى بار، ئاشقازان، ئۈچىيى ياخشى ئەمەس كىشىلەر ھەسەل سۈيى ئىچسە، ئاشقازان، ئۈچەينى ئىسسىتىپ، قەۋزىيەتنى پەسەيتىدۇ. ھەسەل سۈيىنى ئىلمان سۇغا ئارىلاشتۇرۇپ ئىچىش كېرەك، قايناق سۇ ھەسەل تەركىبىدىكى ئاكتىپ ئېنزىم ۋە ۋىتامىنلارنى بۇزغۇنچىلىققا ئۇچرىتىپ، ئۇنىڭ ئوزۇقلۇق قىممىتىنى تۆۋەنلىتىۋېتىدۇ.

4. قايناق سۇ

مەيلى تۇزلۇق سۇ بولسۇن ياكى ھەسەل سۈيى بولسۇن، تۇرمۇشتا ئەڭ كۆپ ئۇچرايدىغان «قايناق سۇ»غا يەتمەيدۇ. ئۇلار بىلەن سېلىشتۇرغاندا، قايناق سۇ بۆرەك، قان تومۇرلارغا ھېچقانداق بېسىم ئېلىپ كەلمەيدۇ، پەقەت مۇۋاپىق مىقداردا ئىچسەكلا، كۆپ ساندىكى كىشىلەر ئۈچۈن ئەڭ ياخشى تاللاش ھېسابلىنىدۇ.

سۇنىڭ تېمپېراتۇرىسىغىمۇ سەل قاراشقا بولمايدۇ. ئەتىگەندە ئىچكەن سۇ بەك قىزىق ياكى بەك سوغۇق بولۇپ كەتسە، ئاشقازان-ئۈچەيگە زىيان يەتكۈزىدۇ. نۇرغۇن كىشىلەر سۇنىڭ قىزىق ياكى سوغۇق بولۇشىغا ئانچە دىققەت قىلىپ كەتمەيدۇ، لېكىن بۇنداق قىلىشنىڭ ئاشقازان-ئۈچەيگە بولغان زىيىنى ئىنتايىن چوڭ.

مۇزدەك سۇ ئاشقازان-ئۈچەينى غىدىقلاپ، ئاشقازان شىللىق پەردە قان تومۇرلىرىنىڭ جىددىي قىسقىرىشىنى كەلتۈرۈپ چىقىرىپ، ئاسانلا ئىچى سۈرىدۇ. يۈرىكى ئاجىز كىشىلەرگە نىسبەتەن ئېيتقاندا، سوغۇق سۇ يەنە جىددىي كېسەللىكلەرنى كەلتۈرۈپ چىقىرىشى مۇمكىن.

بەك قىزىق سۇنى تېخىمۇ ئىچكىلى بولمايدۇ، ئەگەر سوغۇق سۇ ئىچسە بەدەنگە بولغان زىيىنى بىر نومۇر بولسا، ئۇنداقتا قىزىق سۇ ئىچسە 10 نومۇر بولىدۇ!

قىزىلئۆڭگەچنىڭ سىرتقى يۈزىدىكى شىللىق پەردە يۇمران بولۇپلا قالماي، يەنە ئاجىز بولىدۇ، قايناق سۇ قىزىلئۆڭگەچنى زەخىملەندۈرۈپ، كۆپ قېتىم كۆيدۈرىدۇ، شۇنىڭ بىلەن ھۈجەيرىدە غەيرىي ئۆزگىرىش پەيدا قىلىدۇ، يەنە راك پەيدا قىلىدۇ.

℃65تىن ئېشىپ كەتكەن ئىسسىق سۇ 2A تۈرىدىكى راك پەيدا قىلغۇچى ماددىلار قاتارىغا كىرگۈزۈلگەن، شۇڭا سۇ ئىچكەندە بەك قىزىق بولۇپ كېتىشتىن ساقلىنىش كېرەك.