ساياھەتچىلىكنىڭ «ئەگىم يولدا ئېشىپ كېتىش»ىنى ئىشقا ئاشۇرۇشنى تېزلىتىش ئوتتۇرىغا قويۇلدى

ئاپتونوم رايوننىڭ پۈتۈن رايون ساياھىتى بويىچە ئۈلگە كۆرسىتىش رايونى بەرپا قىلىش خىزمىتى نەق مەيدان يىغىنىدا

ساياھەتچىلىكنىڭ «ئەگىم يولدا ئېشىپ كېتىش»ىنى ئىشقا ئاشۇرۇشنى تېزلىتىش ئوتتۇرىغا قويۇلدى

پۈتۈن تاراتقۇ مۇخبىرىمىز تاڭ كەندۇڭ خەۋەر قىلىدۇ: 9 - ئاينىڭ 21 - كۈنى، ئاپتونوم رايون باغراش ناھىيەسىدە پۈتۈن رايون ساياھىتى بويىچە ئۈلگە كۆرسىتىش رايونى بەرپا قىلىش خىزمىتى نەق مەيدان يىغىنى ئۆتكۈزۈپ، پۈتۈن رايون ساياھىتى بويىچە ئۈلگە كۆرسىتىش رايونى بەرپا قىلىش خىزمىتى ۋە ھازىرقى ساياھەت خىزمىتىگە قارىتا قايتا سەپەرۋەرلىك قىلىش، قايتا ئورۇنلاشتۇرما قىلىش، قايتا ئالغا سىلجىتىش قىلىپ، تېكەس ناھىيەسى قاتارلىق ئاپتونوم رايوندىكى ئالتە پۈتۈن رايون ساياھىتى بويىچە ئۈلگە كۆرسىتىش رايونىغا ۋىۋىسكا بەردى.

ئاپتونوم رايونلۇق پارتىيە كومىتېتى دائىمىي كومىتېتىنىڭ ئەزاسى، ئاپتونوم رايوننىڭ مۇئاۋىن رەئىسى ئەركىن تۇنىياز يىغىنغا قاتناشتى ھەم سۆز قىلدى.

ئىگىلىنىشىچە، ھازىرغىچە ئاپتونوم رايونىمىزدا ئىككى ناھىيە دۆلەت پۈتۈن رايون ساياھىتى بويىچە ئۈلگە كۆرسىتىش رايونىنى مۇۋەپپەقىيەتلىك بەرپا قىلغان، ئۈچ ناھىيە دۆلەتنىڭ باھالاپ تەكشۈرۈپ ئۆتكۈزۈۋېلىشىنى قوبۇل قىلىۋېتىپتۇ، 13 ناھىيە ئاپتونوم رايون دەرىجىلىك پۈتۈن رايون ساياھىتى بويىچە ئۈلگە كۆرسىتىش رايونىنى مۇۋەپپەقىيەتلىك بەرپا قىلغان، يەنە 31 ۋىلايەت، ناھىيە ئايرىم - ئايرىم ھالدا دۆلەت ۋە ئاپتونوم رايون بويىچە بەرپا قىلىش ئورنى بولۇپ تاللىنىپ، بەرپا قىلىش خىزمىتىدە پائال ئىلگىرىلەشلەرنى قولغا كەلتۈرگەن.

يىغىندا مۇنداق ئوتتۇرىغا قويۇلدى: پۈتۈن رايون ساياھىتىنى زور كۈچ بىلەن تەرەققىي قىلدۇرۇش شىنجاڭ ساياھەتچىلىكىدىكى «ئالدىنقى قاتاردىكى بايلىق، ئىككىنچى دەرىجىلىك ئېچىش»تىن ئىبارەت مۈشكۈل ئەھۋالنى ئۈنۈملۈك ھەل قىلىپ، ئاپتونوم رايونىمىز ساياھىتىنىڭ تۆت پەسىلدىكى كاسات - ئاۋاتلىقى تەكشى بولماسلىق، جەنۇب بىلەن شىمالدىكى تەرەققىياتى تەڭپۇڭ بولماسلىق مەسىلىسىنى ھەل قىلىپ، ئاپتونوم رايونىمىزنىڭ ساياھەتچىلىك تەرەققىياتىنى ئىدارە قىلىش ئىقتىدارى ۋە ئىدارە قىلىش سىستېمىسىنىڭ زامانىۋىلىشىش سەۋىيەسىنى ئۆستۈرۈپ، شىنجاڭ ساياھەتچىلىكىنىڭ «ئەگىم يولدا ئېشىپ كېتىش»ىنى ئىشقا ئاشۇرۇشنى تېزلىتىش كېرەك.

يىغىندا مۇنداق تەكىتلەندى: ئاپتونوم رايونىمىزنىڭ پۈتۈن رايون ساياھىتى بويىچە ئۈلگە كۆرسىتىش رايونى بەرپا قىلىش خىزمىتىنى پۇختا ئالغا سىلجىتىشتا، «ئىسلاھ قىلىش، يېڭىلىق يارىتىش، سىياسەت ئارقىلىق كاپالەتلەندۈرۈش» «ئورتاق قۇرۇش، ئورتاق بەھرىلىنىش، يۇغۇرما تەرەققىي قىلىش» «ئەسلىھەلەرنى مۇكەممەللەشتۈرۈش، مۇھىتنى ئەلالاشتۇرۇش» «مەھسۇلاتنى موللاشتۇرۇش، سۈپەتلىك ماركا بەرپا قىلىش» «تەشۋىقاتنى كۈچەيتىش، ماركېتىڭنى دەل جايىدا قىلىش» «ئومۇمىي خەلق قاتنىشىش، خەلققە نەپ يەتكۈزۈش، خەلقنى بېيىتىش»تىن ئىبارەت ئالتە تەرەپتىن بۆسۈشنى ئىشقا ئاشۇرۇش كېرەك.

يىغىندا مۇنداق تەلەپ قىلىندى: ھەرقايسى جايلار بولۇپمۇ پۈتۈن رايون ساياھىتى بويىچە ئۈلگە كۆرسىتىش رايونى بەرپا قىلىش ئورۇنلىرى تەشكىلىي رەھبەرلىكنى كۈچەيتىشى، بەرپا قىلىش مەسئۇلىيىتىنى چىڭىتىشى، ھەرىكەت ھالىتىدە باشقۇرۇشنى يەنىمۇ كۈچەيتىشى، تەبەسسۇم ھەرىكىتىنى يولغا قويۇشى، مۇلازىمەت سەۋىيەسىنى ئۆستۈرۈشى، باھالاش مېخانىزمىنى مۇكەممەللەشتۈرۈشى، بەرپا قىلىش لايىھەسىنى ئىنچىكىلەشتۈرۈشى كېرەك.