نىڭبو شەھىرىنىڭ شىنجاڭغا ياردەم بېرىش قوماندانلىق ئىشتابى يېڭى يېزا قۇرۇلۇشىغا ياردەم بەردى

تىيانشان تورى خەۋىرى (مۇخبىر گۇڭ شىجيې، ئىختىيارىي مۇخبىر جۇ فېڭخۇا): 9-ئاينىڭ 18-كۈنى، مۇخبىرنىڭ نىڭبو شەھىرىنىڭ شىنجاڭغا ياردەم بېرىش قوماندانلىق ئىشتابىدىن ئىگىلىشىچە، نىڭبو شەھىرىنىڭ شىنجاڭغا ياردەم بېرىش قوماندانلىق ئىشتابى ۋاقتىدا قول سېلىپ، بەزى يېزا-كەنتلەرنىڭ ئەمەلىي قىيىنچىلىقىنى ھەل قىلىشىغا ياردەم بېرىپ، كۇچا شەھىرىنىڭ ئېكولوگىيە مەدەنىيلىكى يېزا-كەنت قۇرۇلۇشىغا ياردەم بەرگەن.

　　كۇچا شەھىرى ئالاقاغا بازىرى تۈگمەنبېشى كەنتىنىڭ كەنت ئاھالىلەر كومىتېتى ئۇزۇن يىل رېمونت قىلىنمىغانلىقتىن، سىرتقى تام ۋە ئىشخانا قاتارلىقلاردا ئوخشىمىغان دەرىجىدە مەسىلىلەر كۆرۈلگەنىدى، نىڭبو شەھىرىنىڭ شىنجاڭغا ياردەم بېرىش قوماندانلىق ئىشتابى ئەمەلىي ئەھۋالنى ئىگىلىگەندىن كېيىن، 200 مىڭ يۈەن مەبلەغ سېلىپ، كەنت ئاھالىلەر كومىتېتىنىڭ دەرۋازىسىنى قايتىدىن رېمونت قىلىپ، تاملىرىنى ئاقارتىپ، دېھقانلار كەچلىك مەكتىپى، يىغىن زالى، ئاشخانا قاتارلىقلارنى بېزىدى ھەم كەنت ئاھالىلەر كومىتېتىغا بىر تۈركۈم ئىشخانا ئۈسكۈنىلىرىنى سەپلەپ، شۇ جاينىڭ ئىش بېجىرىش مۇھىتىنى ئۈنۈملۈك ياخشىلىدى. كەنت كادىرلىرىنىڭ خىزمەت قىزغىنلىقىنى ئۇرغۇتۇپ، كەنت پارتىيە ياچېيكىسىنىڭ ئۇيۇشۇش كۈچى، مەركەزگە ئىنتىلىش كۈچى ۋە جەڭگىۋارلىقىنى ئاشۇرۇپ، ئاساسىي قاتلام تەشكىلاتلىرىنىڭ مۇلازىمەت سەۋىيەسىنى ئۆستۈردى.