【نامراتلىقتىن قۇتۇلدۇرۇش ئۆتكىلىگە ھۇجۇم قىلىش بويىچە 52 ناھىيەگە سەپەر】 تاللا بازىرىدىكى شىنمېي، كې

تىيانشان تورى خەۋىرى: 9-ئاينىڭ 19-كۈنى، كېرىم سايىمنىڭ ئۆيىدىن پات-پات كۈلكە ئاۋازلىرى ئاڭلىنىپ تۇراتتى، ئۇ زىيارەتكە كەلگەن مۇخبىرغا شىنمېينىڭ قانداق قىلىپ يۇرتداشلارنىڭ «گۆھەر دەرىخى»گە ئايلانغانلىقىنى سۆزلەپ بەرگەنىدى. 60 ياشلىق كېرىمنىڭ ئائىلىسىدە ئىككى جان بولۇپ، يېڭىمەھەللە يېزىسى ئاياغ كەنتىدىكى ئارخىپ تۇرغۇزۇلۇپ كارتا بېجىرىلگەن نامرات ئاھالە ئىدى. ناھىيە، يېزىنىڭ ياردىمىدە، ئۇ 23 مو تېرىلغۇ يېرىنىڭ كېۋەز، بۇغداي تېرىلىدىغان 15 موسىنى مېۋىلىك باغقا ئۆزگەرتتى، بۇنىڭ ئىچىدە 10 مو يەردىكى شىنمېي پۈتۈنلەي مېۋىگە كىردى.

　　2019-يىلى كېرىم ئائىلىسىنىڭ كىشى بېشىغا توغرا كېلىدىغان ئوتتۇرىچە ساپ كىرىمى 16 مىڭ 460 يۈەن بولۇپ، شۇ يىلىلا نامراتلىقتىن قۇتۇلدى. پەيزاۋات ناھىيەسى شىنمېينىڭ بازار ئىستىقبالىنى چىڭ تۇتۇپ، ھەر يىلى ئېتىبار بېرىش سىياسىتىنى يولغا قويۇپ، كۆچەت ۋە ئۇلاش، ئۇلاق ھەققىگە تولۇقلىما بېرىپ، شىنمېي كەسپىنى تەرەققىي قىلدۇرۇپ زورايتتى. ناھىيە، يېزا مالىيەسى ھېسابات قىلىدىغان، باغۋەنلەر ھەقسىز مۇلازىمەتتىن بەھرىمەن بولىدىغان باغۋەنچىلىك كەسپىي تېخنىكا مۇلازىمەت ئەترىتى قۇرۇپ، باغۋەنلەرگە مۇۋاپىق ۋاقىتتا تېخنىكا جەھەتتىن مۇلازىمەت قىلىپ ۋە يېتەكچىلىك قىلىپ، كېسەللىك ۋە ھاشارەت زىيىنىنىڭ بىرتۇتاش ئالدىنى ئالدى.

　　نۆۋەتتە، پەيزاۋات ناھىيەسىنىڭ باغ-ئورمان ئومۇمىي كۆلىمى 480 مىڭ موغا يەتتى، بۇنىڭ ئىچىدە شىنمېينىڭ كۆلىمى 380 مىڭ موغا، مېۋىگە كىرگەن كۆلەم 110 مىڭ موغا يەتتى. ئەڭ بۇرۇن تېرىغان، مېۋە بېرىش كۆلىمى ئەڭ چوڭ يېڭىمەھەللە يېزىسىدا 2019-يىلى شىنمېي كىشى بېشى كىرىمىنى 1000 يۈەن ئاشۇردى، شىنمېي پەيزاۋات دېھقانلىرىنىڭ «تىللا تۆكۈلىدىغان دەرىخى»ىگە، پەيزاۋات ناھىيەسى مەملىكەت بويىچە ئەلا سۈپەتلىك شىنمېي بازىسىغا ئايلاندى. مېۋىلىك دەرەخ يېنىدا، كېرىم مۇخبىرغا مۇنداق دېدى: بۇ يىل 8-ئايدا، شىنمېي سېتىۋېلىش پەسلىدە، ئۆزىمىز تېرىغان تۆت مو شىنمېينى 43 مىڭ يۈەنگە ساتتىم. 50 ديۇيملىق تېلېۋىزور ئېلىشنى پىلانلاۋاتىمەن. ئوغلۇمنىڭ ئاپتوموبىلى بار، دېھقانچىلىقنىڭ ئارىسال ۋاقىتلىرىدا، خوتۇنۇمنى ئېلىپ ئاپتوموبىل ھەيدەپ ساياھەت قىلىشنى ئويلىشىۋاتىمەن.