تارىم داشۆسىنى پۈتكۈزگەن %70كە يېقىن ئوقۇغۇچى جەنۇبىي شىنجاڭدا يىلتىز تارتتى

9-ئاينىڭ 11-كۈنى، تارىم داشۆسى ھايۋانات ئىلمى شۆيۈەنىنىڭ ئاسپىرانتلىرى تەجرىبە ئىشلىمەكتە.

(جوۋ پېڭ فوتوسى)

  خەلق تورى خەۋىرى: «ئوقۇش پۈتكۈزگەندىن كېيىن، مېنىڭ بۇ يەردە قېلىپ، ئۆگەنگەن كەسپىم ئارقىلىق جەنۇبىي شىنجاڭدىكى ئاساسىي قاتلام ئۈچۈن خىزمەت قىلغۇم بار» 9-ئاينىڭ 11-كۈنى، شىنجاڭ ئارال شەھىرىگە جايلاشقان تارىم داشۆسىدە، خېبېي شىڭتەيدىن كەلگەن سۇچىلىق قۇرۇلۇشى شۆيۈەنىنىڭ 4-يىللىق ئوقۇغۇچىسى بو گۇاڭشو مۇخبىرغا كەلگۈسى پىلانى ئۈستىدە توختىلىپ شۇنداق دېدى، بىرنەچچە يىللىق ئالىي مەكتەپ تۇرمۇشىدا، توغراق بىلەن قاپلانغان بۇ زېمىن ئۇنى ئۆزىگە چوڭقۇر جەلپ قىلغانىدى.

   62 يىل ۋاقىتنىڭ ئۆتۈشى بىلەن، بۈگۈنكى كۈندە «95-يىللاردا تۇغۇلغان» داشۆ ئوقۇغۇچىلىرى يېرىم ئەسىر ئىلگىرى ئەزەلدىن چۆل پېتى تۇرۇپ كەلگەن قۇملۇقنىڭ چېتىدە، توغراقلىقتا جاپا-مۇشەققەتكە چىداپ كۈرەش قىلغان «توغراق ياشلىرى»غا ئوخشاش تاللاش قىلدى. ئىستاتىستىكا قىلىنىشىچە، مەكتەپ قۇرۇلغان 62 يىلدىن بۇيان، تارىم داشۆسى جەمئىيەت ئۈچۈن 70 مىڭغا يېقىن ئوقۇش پۈتكۈزگەن ئوقۇغۇچىنى تەربىيەلىگەن، بۇنىڭ ئىچىدە %68.5ى جەنۇبىي شىنجاڭدا يىلتىز تارتقان، %52ى ئىچكىرى ئۆلكىلەردىن كېلىپ شىنجاڭدا قېلىپ خىزمەت قىلغان. بۇ يەر، شىنجاڭنىڭ يۇقىرى قاتلاملىق ئىختىساسلىقلارنى تەربىيەلەشتىكى مۇھىم بازىسى ۋە جەنۇبىي شىنجاڭ كادىرلىرى بۆشۈكىنىڭ بىرىگە ئايلانغان.

   1958-يىلى 10-ئايدا، دۆلەتنىڭ بوز يەر ئۆزلەشتۈرۈپ چېگرانى مۇستەھكەملەش ئىشلىرى ۋە تارىم بوز يەر ئۆزلەشتۈرۈش رايونىنى ئېچىشنىڭ تۈرلۈك ئىختىساسلىقلارغا بولغان ئېھتىياجىغا ماسلىشىش ئۈچۈن، شۇ چاغدىكى دۆلەت بوز يەر ئۆزلەشتۈرۈش مىنىستىرلىقىنىڭ مىنىستىرى   ۋاڭ جېن جاڭجۈننىڭ غەمخورلۇقىدا، تارىم داشۆسى ماس ھالدا بارلىققا كەلدى. مەكتەپ قۇرۇلغان دەسلەپكى مەزگىلدە، ئاسمان يېپىنچا، يەر سېلىنچا، دالا دەرسخانا قىلىندى؛ قولغا قەلەم ئېلىپ، ئوتىغۇچنى مۈرىگە ئارتىپ، زېمىنغا ئەسەر پۈتۈلدى. دەل مۇشۇنداق جاپالىق شارائىتتا، مەكتەپ «جاپا-مۇشەققەتكە چىداپ كۈرەش قىلىش، بوشاشماي ئىلگىرىلەش، چېگرا رايوندا يىلتىز تارتىش، ئۆزىنى بېغىشلاش» ئاساسىي مەزمۇن قىلىنغان توغراق روھىنى يېتىلدۈردى. 62 يىلدىن بۇيان مەملىكەتنىڭ ھەرقايسى جايلىرىدىن كەلگەن تۈركۈم-تۈركۈملىگەن ئوقۇغۇچىلار، مەسلىھەتلىشىۋالغاندەك ئوقۇش پۈتكۈزگەندە بۇ يەردە قېلىپ شىنجاڭنى قۇرۇشنى تاللىدى.

   پەيزاۋات ناھىيەسى قىزىلسۇ يېزىسىنىڭ باش لىغىلدىما كەنتى پارتىيە ياچېيكىسىنىڭ شۇجىسى فەن شياۋكاڭ، تارىم داشۆسىنىڭ قوللىنىشچان خىمىيە كەسپىنى 2016-يىلى پۈتكۈزگەن بولۇپ، ئىلگىرى ئوقۇغۇچىلار ئۇيۇشمىسىنىڭ رەئىسى بولغان.

   «كەنتىمىزدىكى 150 مو يەردىكى شىنمېي بۇ يىل مول ھوسۇل بېرىپ، سېتىش سوممىسى 650 مىڭ يۈەنگە يەتتى» دېدى فەن شياۋكاڭ، خىزمەتكە چىققاندىن كېيىن ئۇ دائىم يەنە مەكتەپ تور بېكىتى ئارقىلىق تېرىقچىلىق تېخنىكىسى جەھەتتىكى بىلىملەرنى ئۆگەندى، «پەن-تېخنىكا خاس ۋەكىلى بىلەن ئۇدۇللاشقاندىن كېيىن، بەزى تېخنىكىلارنى شىنمېي تېرىقچىلىقىدا قوللاندىم.» بۇ يىل، ئۇ يەنە ئىشلەپ تۇرۇپ تارىم داشۆسىنىڭ يېزا تەرەققىياتى كەسپىدە ئاسپىرانتلىقتا ئوقۇش ئۈچۈن ئىمتىھان بېرىپ ئۆتتى.

   بۈگۈنكى كۈندە، تارىم داشۆسى دوكتورلۇق ئۇنۋانى بېرىش ئورنى، ھوقۇق بېرىش نۇقتىسى قۇرۇلۇشىدا «نۆل» بۆسۈشنى ئىشقا ئاشۇردى؛ مەكتەپ مائارىپ مىنىستىرلىقىنىڭ تولۇق كۇرس ئوقۇتۇش خىزمىتىنى تەكشۈرۈپ باھالاشتا باھالاش مۇتەخەسسىسلەر گۇرۇپپىسىنىڭ تولۇق مۇئەييەنلەشتۈرۈشىگە ئېرىشتى، مەكتەپ بىڭتۇەن ۋە مائارىپ مىنىستىرلىقى بىرلىكتە قۇرغان ئالىي مەكتەپكە ئايلاندى.

   تارىم داشۆسى پارتىيە كومىتېتىنىڭ شۇجىسى جاۋ گۇاڭخۇي مۇنداق دېدى: «بىز دىققەتنى جەنۇبىي شىنجاڭنىڭ ئىقتىسادىي، جەمئىيەت تەرەققىياتىنىڭ ئېھتىياجىغا داۋاملىق مەركەزلەشتۈرۈپ، پەن كەسىپ قۇرۇلمىسىنى تەڭشەيمىز، ئەلالاشتۇرىمىز. ۋەتەننى، شىنجاڭنى سۆيىدىغان، مەسئۇلىيەتنى زىممىسىگە ئېلىپ ئۆزىنى بېغىشلايدىغان، چېگرا رايوندا يىلتىز تارتىدىغان، چېگرا رايونغا ئۆزىنى بېغىشلايدىغان تېخىمۇ كۆپ يېڭى دەۋردىكى چېگرانى قوغداش ئىختىساسلىقلىرىنى زور كۈچ بىلەن يېتىشتۈرىمىز».