يانچۇق تومپايدى − گۈزەل تۇرمۇش «ئىشلەش»تىن كېلىدۇ

سىرتقا چىقىپ ئىشقا ئورۇنلاشقانلار كۆپەيدى، كىرىمنى ئاشۇرۇش يوللىرى كېڭەيدى، ئىچكى ھەرىكەتلەندۈرگۈچى كۈچ كۈچەيدى... جەنۇبىي شىنجاڭنىڭ بىپايان تۇپرىقىغا سەپەر قىلسىڭىز ھەر مىللەت ئاممىنىڭ ئىشلەپچىقىرىشى، تۇرمۇشى، روھىي قىياپىتىدە چوڭقۇر ئۆزگىرىش بولغانلىقىنى، پۇقرالارنىڭ «ھەميانى»نىڭ بارغانسېرى تومپايغانلىقىنى، كۈنلىرىنىڭ بارغانسېرى ياخشىلانغانلىقىنى، كەيپىياتىنىڭ بارغانسېرى ئازادىلەشكەنلىكىنى، تەبەسسۇمىنىڭ بارغانسېرى جىلۋىلەنگەنلىكىنى كۆرىسىز.

بۇنداق ئۆزگىرىش كىشىنى ھەيران قالدۇرىدۇ ھەم خۇش قىلىدۇ. جەنۇبىي شىنجاڭ ئىلگىرى «ئۈچ خىل كۈچ»نىڭ زىيانكەشلىكىگە چوڭقۇر ئۇچرىغان، بىر قىسىم ئامما ئەسەبىي ئىدىيەنىڭ زەھەرلىشىگە ئۇچراپ، زامانىۋى ئىلىم - پەن بىلىملىرىنى چەتكە قېقىپ، ئىشقا ئورۇنلىشىش ماھارىتىنى ئۆگىنىش، ئىگىلەشنى رەت قىلغاچقا، كىرىمى ئىنتايىن چەكلىك ئىدى. ئاياللار ئۇزاق مەزگىل قازان بېشىنى چۆرىدەپ يۈرگەچكە، ھەر خىل ئاتالمىش «قائىدە»لەرنىڭ چەكلىمىسى تۈپەيلىدىن يۈزىنى ئېچىپ يالاڭباش يۈرەلمەيتتى، سىرتقا چىقىپ ئىشقا ئورۇنلىشىشىدىن تېخىمۇ ئېغىز ئاچقىلى بولمايتتى.

بۈگۈنكى كۈندە، خاس تېرىقچىلىق، باقمىچىلىق، سىرتقا چىقىپ ئىشلەمچىلىك قىلىش، ھەمكارلىق كوپىراتىپىغا قاتنىشىش... كىشىلەر ئېتىز باشلىرىدىن ئىشلەپچىقىرىش سېخلىرىغىچە نامراتلىقتىن قۇتۇلۇپ، كىرىمىنى ئاشۇرۇپلا قالماي، يەنە نەزەر دائىرىسىنى كېڭەيتىپ، بىلىمىنى ئاشۇردى.

تۇرمۇشنى ئۆزگەرتىدىغان، قىياپەتنى ئۆزگەرتىدىغان بىر خىل كۈچلۈك ھەرىكەتلەندۈرگۈچى كۈچ جەنۇبىي شىنجاڭنى ئويغىتىپ، بۇ قەدىمىي تۇپراقنىڭ ھاياتىي كۈچىنى ئۇرغۇتماقتا.

سىرتقا چىقىپ ئىشقا ئورۇنلاشقانلار كۆپەيدى

9 - ئاينىڭ 11 - كۈنى چۈشتە، ئاقتۇ ناھىيەسىنىڭ بارىن يېزىسىدىكى ئىگىلىك تىكلەش، ئىشقا ئورۇنلاشتۇرۇش ئەمەلىي مەشىق بازىسىدا چۈشلۈك دەم ئېلىش ۋاقتى بولدى، ھۆرىگۈل تۇرسۇن سېختىن چىقىپ، توكسىكلىتىنى مىنىپ، ئۆيىگە قايتىپ چۈشلۈك تاماق يېيىشكە تەييارلاندى.

ھۆرىگۈل بارىن يېزىسىنىڭ قورغان كەنتىدىكى ئارخىپ تۇرغۇزۇلۇپ كارتا بېجىرىلگەن نامرات ئاھالە، ھازىر ئىشقا ئورۇنلاشتۇرۇش ئەمەلىي مەشىق بازىسىدىكى بىر ئېلېكتىرون شىركىتىنىڭ ئىشچىسى بولۇپ، بۇ يەردە ئىشلەۋاتقىنىغا بىر يىلدىن ئاشتى.

سۇس قوڭۇر رەڭلىك چېچىنى ئېگىز بوغۇۋالغان، سۇس گىرىم قىلغان، پاكىز، چاققان كەسپىي ئايال ئوبرازىدىن ئۈچ يىل ئىلگىرى ئۇنىڭ تېخى دېھقانچىلىق قىلىدىغان ئايال ئىكەنلىكىنى تەسەۋۋۇر قىلىش تەس ئىدى.

«ئىلگىرى ئاياللار ئۆيدە ئولتۇرۇشى، ھويلا سۈپۈرۈپ، تاماق ئېتىپ، بالىلارغا قاراپ، قوي باقسىلا، ئازراقلا يېرىنى چۆرىدەپ، ئوچاق بېشىنى چۆرگۈلەپ يۈرسىلا بولىدۇ، دەپ قارايتتۇق. بەختكە يارىشا، كەنت ئاھالە كومىتېتى ۋە شىركەت رەھبەرلىرى ئىشىك ئالدىمىزغىچە كېلىپ ئىدىيەۋى خىزمەت ئىشلەپ، بىزنىڭ ئاۋۋال بېرىپ سىناپ بېقىشىمىزنى ئېيتتى» دېدى ھۆرىگۈل سەل خىجىل بولغان ھالدا ئىلگىرىكى ئىشلارنى ئەسلەپ.

بۈگۈنكى كۈندە ھۆرىگۈل پىشقان ئىشچىغا ئايلىنىپ، كىرىمى مۇقىم بوپتۇ، كۈندىلىك چىقىمىنى چىقىرىۋەتكەندە، يەنە 10 مىڭ يۈەن ئامانەت پۇلى بار ئىكەن. «ئىلگىرى ئون يۈەنلىك كۆكتات سېتىۋالماقچى بولساممۇ ئېرىمدىن پۇل سورايتتىم، ھازىر مەن تاپقان پۇلۇمغا ئۆيگە كىرئالغۇ، تېلېۋىزور سېتىۋالدىم، يەنە قېيىنئانام، ئاتا - ئانامغا خەجلىگىلى پۇل بېرەلەيمەن، بالىلىرىمنىڭ تەربىيەلىنىش ھەققىنى تاپشۇرالايمەن...» دېدى ھۆرىگۈل پەخىرلەنگەن ھالدا.

يېزىدىن شەھەرگىچە، دېھقاندىن ئىشچىغا ئۆزگىرىشكىچە، كېسەك ئۆيدىن ناھىيە بازىرىدىكى تۇرالغۇ ئۆيگىچە، ھۆرىگۈلنىڭكىگە ئوخشاش ئىشقا ئورۇنلىشىش ھېكايىلىرى جەنۇبىي شىنجاڭدىكى ئۈچ ۋىلايەت، بىر ئوبلاستتا ماڭدامدا بىر ئۇچراپ تۇرىدۇ. يېڭى ئىدىيە ۋە يېڭى كەيپىيات شەكىللەنمەكتە، ھەر مىللەت ئامما شۇنى تونۇپ يەتتىكى: ئىشقا ئورۇنلىشىش نامراتلىقتىن قۇتۇلۇشتىكى ئەڭ ئۈنۈملۈك چارە.

سەھەر سائەت 6دە غۇلام مۇتەللىپ پىكاپىنى توختىتىپ، كەلپىن ناھىيەسىنىڭ يۇرچى يېزىسى تومئېرىق كەنتىدىكى ئۆرۈك يۇرتى نانچىلىق ھەمكارلىق كوپىراتىپىغا دەل ۋاقتىدا كىرىپ كەلدى. خېمىر يۇغۇرۇپ، خېمىر يېيىپ، نېپىز ناننى قولىغا ئېلىپ ئىككى پىرقىرىتىپ، «پاققىدە» قىلىپ تونۇرغا ياقتى، بىردەمدىن كېيىن نېپىز نان تونۇردىن چىقتى.

غۇلامنىڭ ئون يىللىق نان يېقىش تەجرىبىسى بار بولۇپ، ئاپتونوم رايون دەرىجىلىك غەيرىي ماددىي مەدەنىيەت مىراسى − كەلپىندىكى ئۇيغۇر مىللىتىنىڭ چېپىت (نېپىز نان) نېنى يېقىش ھۈنىرى ۋارىسى.

غۇلامنىڭ مۇخبىرغا ئېيتىشىچە، ئىلگىرى، ئۇ ئۆيدە نان يېقىپ بازارغا ئاپىرىپ ساتىدىغان بولۇپ، كىرىمى مۇقىم ئەمەس ئىكەن، بىر كۈن ياققان نانلىرىنى ھەمىشە ئۈچ - تۆت كۈندە ئاران سېتىپ بولاتتىكەن. 2018 - يىلى 5 - ئايدا، ئۆرۈك يۇرتى نانچىلىق ھەمكارلىق كوپىراتىپى قۇرۇلدى، غۇلام تىزىمغا ئالدۇرۇپ ئەزا بولدى، شۇ يىلى، ئائىلىسىنىڭ كىشى بېشى كىرىمىنى 10 مىڭ يۈەندىن ئاشۇردى، يەنە ئاپتوموبىل سېتىۋالدى، يېڭى ئۆي سېلىۋالدى.

«ھازىر بىز بىلىم ۋە ماھارەتنىڭ تۇرمۇشىمىزنى ئۆزگەرتەلەيدىغانلىقىنى تونۇپ يەتتۇق. مەن ناھىيە بازىرىدىن بىر يۈرۈش بىنا ئۆي سېتىۋېلىپ، بالىلارنى تېخىمۇ ياخشى تەربىيەلىنىش ئىمكانىيىتىگە ئىگە قىلماقچى بولۇۋاتىمەن» دېدى غۇلام.

ئىشىك ئالدىدىكى كەنت قۇرغان زاۋۇت، نامراتلارنى يۆلەش سېخىدا ئىشقا ئورۇنلىشىش ئىشقا ئاشۇرۇلدى، دۆلەت ئىلكىدىكى كارخانىلار، ئومۇمىي مۈلۈكچىلىكتە بولمىغان كارخانىلار، ئاممىۋى مەنپەئەت ئىش ئورنى قاتارلىق ئوخشاش بولمىغان ئىش ئورۇنلىرىدا ئىشقا ئورۇنلىشىش ئىشقا ئاشۇرۇلدى... جەنۇبىي شىنجاڭ رايونىدىكى 22 ئېغىر نامرات ناھىيە ۋە بىڭتۇەندىكى تۆت ئېغىر نامرات تۇەن - چاڭدا ئىشقا ئورۇنلاشتۇرۇش ئارقىلىق نامراتلارنى يۆلەش ئۈچ يىللىق يىرىك پىلانى يولغا قويۇلدى، 2018 - يىلىدىن 2020 - يىلى 6 - ئايغىچە، ئارخىپ تۇرغۇزۇلۇپ كارتا بېجىرىلگەن نامرات ئائىلىلەردىكى جەمئىي 221 مىڭ ئەمگەك كۈچىنىڭ يۆتكىلىپ ئىشقا ئورۇنلىشىشىغا ياردەم بېرىلدى.

بۈگۈنكى كۈندىكى جەنۇبىي شىنجاڭدا بارغانسېرى كۆپ نامرات ئائىلىلەردىكى ئەمگەك كۈچلىرى ئۆيلىرىدىن چىقىپ، زاۋۇتلارغا كىردى، سىرتقا چىقىپ ئىشلەمچىلىك قىلىش، ئىشقا ئورۇنلىشىشنى خالىماسلىقتىن، تەشەببۇسكارلىق بىلەن تەربىيەلەشكە قاتنىشىشقىچە تەشەببۇسكارلىق بىلەن سىرتقا چىقىپ ئىشقا ئورۇنلىشىپ كىرىم سەۋىيەسىنى ئۈزلۈكسىز ئۆستۈردى، تۇرمۇش سۈپىتى بارغانسېرى يۇقىرى كۆتۈرۈلدى، ئېرىشىش تۇيغۇسى، بەخت تۇيغۇسى، بىخەتەرلىك تۇيغۇسى كۆرۈنەرلىك كۈچەيدى.

كىرىمنى ئاشۇرۇش يوللىرى كېڭەيدى

9 - ئايدا، خوتەن ناھىيەسىدىكى ئېتىزلىقلار ياپيېشىل ياڭاق دەرەخلىرى بىلەن قاپلانغان بولۇپ، ھاۋاسى ساپ ئىدى. بۇزاق يېزىسى تېرەكئېرىق كەنتىنىڭ كەنت ئاھالىسى ئابدۇخېلىل ئابدۇللا ئائىلىسىنىڭ توشقان قەپەزلىرىدە، تۈكى مامۇقتەك توشقانلار ئەركىن - ئازادە يەم يەپ سۇ ئىچىۋاتاتتى.

بۇزاق يېزىسى خوتەن ناھىيەسىدىكى ياڭاق رايونى مەركەزلەشكەن يېزا - بازار بولۇپ، خېلى ئۇزاق مەزگىلگىچە ئابدۇخېلىل بىرنەچچە مو يەردە ياڭاق ئۆستۈرۈشكە تايىنىپ تۇرمۇشىنى قامداپ كەلگەنىدى.

«ئەينى چاغدا تۇرمۇشىمىز غورىگىل ئىدى، كۆپچىلىكنىڭ ئويلايدىغىنى ئەپلەپ - سەپلەپ كۈن ئۆتكۈزۈش ئىدى. ھەم پۇل تاپقىلى بولىدىغان بىرەر چارىنىمۇ ئويلاپ تاپالمايتتۇق، ھەم ناھايىتى كۈچلۈك ھەرىكەتلەندۈرگۈچى كۈچمۇ يوق ئىدى» دېدى ئابدۇخېلىل.

2019 - يىلى، بۇزاق يېزىسى نەسىللىك توشقان باقمىچىلىق تۈرىنى قانات يايدۇردى، ھازىرقى ھالەتنى ئۆزگەرتمەكچى بولغان ئابدۇخېلىل بىرىنچى بولۇپ تەشەببۇسكارلىق بىلەن «تەمىنى تېتىش»نى تەلەپ قىلىپ، 100 توشقان باقتى، شۇ يىلى ساپ كىرىمى 12 مىڭ يۈەنگە يەتتى.

ئىككى يىل توشقان بېقىۋېدى ئابدۇخېلىلنىڭ يانچۇقى تومپىيىپلا قالماي، ئويلايدىغىنى تېخىمۇ كۆپەيدى.

نەسىللىك توشقان باقمىچىلىق ئەترىتى قۇرۇپ، كەنت ئاھالىلىرىگە باقمىچىلىق تېخنىكىسىنى سۆزلەپ بەردى، 56 كەنت ئاھالىسىنىڭ ئاقسۇ ۋىلايىتىگە بېرىپ پاختا تېرىشىغا باشلامچىلىق قىلدى... «ھەرىكەتكە كەلسەكلا، ھەممىلا يەردە كىرىم قىلالايمىز. ئەمدى مەن بازاردىن يايما ئورنى ئىجارىگە ئېلىپ، سوغۇق ئىچىملىك دۇكىنى ئېچىشنى ئويلىشىۋاتىمەن.» بۇنىڭدىن كېيىنكى تۇرمۇشىغا نىسبەتەن، ئابدۇخېلىلدا تولۇپ تاشقان غەيرەت بولۇپلا قالماي، يەنە ئوي - پىكىر ۋە پىلانمۇ بار.

توقۇمىچىلىق، كىيىم - كېچەك، ئىستېمال، ئېلېكتىرون، ئاياغ - باش كىيىم، چامادان - سومكا قاتارلىق ئەمگەك كۆجۈملەشكەن كەسىپلەر، ھەمدە ئېلېكتىرونلۇق سودا ئىشلىرى، مەدەنىيەت ئىجادىيىتى، پۈتۈن رايون ساياھىتى، ساغلاملىق - كۈتۈنۈش قاتارلىق زامانىۋى مۇلازىمەت كەسىپلىرى دېھقان - چارۋىچىلارنىڭ كىرىمىنى ئاشۇرۇش يوللىرىنى بارغانسېرى كېڭەيتتى.

ئابدۇرۇسۇل مەتنىيازنىڭ ئۆيىگە كىرسىڭىز، خۇددى ھايۋاناتلار باغچىسىغا كىرگەندەك بولىسىز. «تۆگىقۇش، توز، كالا، قوي، توخۇ، غاز باققاندىن باشقا، مەن يەنە بىر قۇرۇلۇش ئىشچىسى، كەنتتىكى ئون نامرات ئاھالىنى يېتەكلەپ، ئىشنى ھۆددىگە ئېلىپ ئىشلەپ، ھەر يىلى نۇرغۇن پۇل تاپالايمەن» دېدى 9 - ئاينىڭ 15 - كۈنى ئابدۇرۇسۇل قىن قىنىغا پاتمىغان ھالدا.

ئابدۇرۇسۇل خوتەن ناھىيەسى لاڭرۇ يېزىسى چىگىلىك كەنتىنىڭ كەنت ئاھالىسى بولۇپ، ئۆيىدە ئېغىر كېسەلگە گىرىپتار بولغان ئوغلى بار ئىدى. تام قوپۇرۇش، تام ئاقارتىشتىن ئائىلىسىدىكىلەرنى ئېلىپ ئاقسۇغا بېرىپ چىلانلىقنى پەرۋىش قىلىش، پاختا تېرىشقىچە، ئابدۇرۇسۇل پۈتۈن كۈچى بىلەن تىرىشىپ ئاخىر بىر ئاز پۇل تېپىپ يېڭى ئۆي سېلىۋالدى. تۇرمۇشى مۇقىملاشقان ئابدۇرۇسۇل بىر تەرەپتىن يەر تېرىشنى، باقمىچىلىقنى راۋاجلاندۇرۇشنى، بىر تەرەپتىن بالىسىنىڭ ھالىدىن خەۋەر ئېلىشنى قارار قىلدى.

2019 - يىلى، ئابدۇرۇسۇل خوتەن ناھىيەسى لاڭرۇ يېزىسىدا چىگىلىك قول ھۈنەرۋەنچىلىك دېھقانلار كەسپىي ھەمكارلىق كوپىراتىپى قۇردى. «ھازىر ھەمكارلىق كوپىراتىپىمىز قوبۇل قىلىدىغان ئىشلار بارغانسېرى كۆپەيدى» دېدى ئابدۇرۇسۇل.

بەش قوي 40 بولدى، بۇ يىل سېتىۋالغان 250 چۈجە كۈندىن - كۈنگە چوڭىيىۋاتىدۇ؛ 4000 يۈەنگە سېتىۋالغان يەتتە توزنى يەنە بىر مەزگىل باققاندىن كېيىن، ھەر بىرىنى 3000 يۈەنلىك باھادا ساتقىلى بولىدۇ؛ ئۈچ تۆگىقۇشنىڭ ئىچىدىكى ئىككى چىشى تۆگىقۇش ھەر ھەپتىدە ئىككى تۇخۇم تۇغىدۇ؛ يەنە بەش كالا، 35 ئۆردەك، 150 غاز، 7000 ئورمان كەكلىكى بار... بۈگۈنكى كۈندە، ئابدۇرۇسۇلنىڭ ئىشلىگەنسېرى غەيرىتى ئاشتى.

تۈرلۈك خىزمەتلەرنىڭ جەنۇبىي شىنجاڭدا تەڭ ئىلگىرىلىشىگە ئەگىشىپ، نامراتلىقتىن قۇتۇلدۇرۇش ئۆتكىلىگە ھۇجۇم قىلىش كۈچەپ ھۇجۇم قىلىش باسقۇچىغا كىردى، كىرىمنى ئاشۇرۇش يوللىرىمۇ بارغانسېرى كېڭەيدى. ھەر مىللەت ئاممىنىڭ قەلبى تېخىمۇ بىر نىيەتتە بولدى، كۆپچىلىك بىر نىيەتتە ئويلاپ، بىر مەقسەتتە كۈچ چىقىرىپ، ئەمگەكچان بىر جۈپ قولىغا تايىنىپ، تىرىشىپ تېخىمۇ ياخشى تۇرمۇش كەچۈرمەكتە، تېخىمۇ بەختلىك، گۈزەل يۇرت - ماكان قۇرماقتا.

ئىچكى ھەرىكەتلەندۈرگۈچى كۈچ كۈچەيدى

باش كۈزدە، قاغىلىق ناھىيەسىنىڭ ئاقتاش بازىرىغا جايلاشقان نامراتلارنى باشقا جايغا كۆچۈرۈپ يۆلەش بويىچە ئورۇنلاشتۇرۇش رايونىدا قاتار - قاتار قىزىل ئۆگزىلىك يېڭى ئۆيلەر قۇياش نۇرىغا چۆمۈلگەنىدى.

پاكىز مېھمانخانا ئۆيىدە 75 ياشلىق توختى مۇسايۇپ سافادا ئولتۇرۇپ، نامراتلارنى يۆلەش بويىچە باشقا جايغا كۆچۈرۈلگەندىن كېيىنكى خۇشاللىقىنى مۇخبىر بىلەن ھەمبەھرىلەندى.

«ھويلىغا شوخلا، لازا، چەيزە تېرىدۇق، ئۆيدە تېلېۋىزور، سافا، ساجى بار، بىزنىڭ بۇ ئورۇنلاشتۇرۇش رايونىدا، ئاپتاپقا قاقلىنىپ ئولتۇرىدىغان بىكارچىلار ئازايدى، كۆپچىلىك شەھەرلىكلەرگە ئوخشاش، ۋاقتىدا ئىشقا بېرىپ، ئىشتىن چۈشۈپ، مائاش ئېلىش بىلەن ئالدىراش بولۇپ كەتتى.» توختى «مائاش» دېگەن سۆزنى قىلغاندا، ئاۋازى تېخىمۇ ياڭراق چىقتى.

ئىلگىرىكى بېكىنمە، مۇتەئەسسىپ ھالەتتىن بۈگۈنكى كۈندىكى ئېچىۋېتىش، ئىلگىرىلەشكىچە، جەنۇبىي شىنجاڭنىڭ بىپايان تۇپرىقىغا سەپەر قىلسىڭىز ئۆزگىرىش بولغانلىرىنىڭ پەقەت تۇرمۇش، ھويلا - ئارانلارلا ئەمەس، يەنە ھەر مىللەت ئاممىنىڭ جۇشقۇن روھىي ھالىتى ئىكەنلىكىنى كۆرۈۋالالايسىز.

ئۆزىگە ئىشىنىش، ئوچۇق بولۇش، سىغدۇرۇشچان بولۇش... بۈگۈنكى كۈندە، جەنۇبىي شىنجاڭدىكى بارغانسېرى كۆپ ئاممىنىڭ جىسمىدا بۇ زامانىۋى مەدەنىيلىك سالاپىتى نامايان بولدى. مۇخبىر يەكەن ناھىيەسى چارەك بازىرى چارەكبازار كەنتىنىڭ كەنت ئاھالىسى بېلىقىز سەمەرنىڭ ۋۇجۇدىدىن تولۇپ تاشقان ئىشەنچنى كۆردى.

بېلىقىز بىر ئېلېكتىرون پەن - تېخنىكا شىركىتىنىڭ ئىشچىسى بولۇپ، شىركەتكە يېڭى كەلگەندە، ئۇ ناھايىتى تەس ھېس قىلدى، بىر كۈندە ئاران 100 ئەتراپىدا سىم ئورام ئورىيالايتتى.

«ھازىر ئۇستا بولۇپ كەتتىم، ھەر كۈنى 1000دىن ئارتۇقنى ئورىيالىشىمدا گەپ يوق. قەرزلىرىمنى قايتۇرۇپ بولۇپلا قالماي، يەنە 15 مىڭ يۈەن پۇل ئامانەت قويدۇم. ھەر كۈنى سائەت 8دە ئورنۇمدىن تۇرۇپ، ناشتىلىق تەييارلاپ، يۇيۇنۇپ تارىنىپ بولغاندىن كېيىن، سۇس گىرىم قىلىپ ئىشقا بارىمەن. قىزىمنىڭ دېيىشىچە، ئۇ مېنىڭ ھازىرقى ھالىتىمنى بەك ياخشى كۆرىدىكەن.» بۇ گەپلەرنى قىلىۋاتقاندا، بېلىقىزنىڭ چىرايىدا كۈلكە جىلۋىلەندى.

ئۆزىگە ئىشىنىش كىشىلەرنىڭ ئۆزىنىڭ تەرەققىيات ئەھۋالىنى ئېتىراپ قىلىشىدۇر. بېلىقىزغا ئوخشاش بارغانسېرى كۆپ جەنۇبىي شىنجاڭلىق قارىشىنى ئۆزگەرتىپ، ماھارەت ئۆگىنىپ، خىزمەت تېپىپ، تۇرمۇش ئەھۋالىنى ئۆزگەرتتى، بۇنىڭ بىلەن ئىچ - ئىچىدىن ئىشەنچكە تولغان روھىي قىياپەت ئۇرغۇدى.

يۆلەپ بولالمايدىغان ئامما يوق، پەقەت ماس كەلمەيدىغان چارىلا بار. ئىرادە جەھەتتىن يۆلەش، ئەقىل جەھەتتىن يۆلەش ئارقىلىق نامرات ئاممىنىڭ نامراتلىقتىن قۇتۇلدۇرۇش ئۆتكىلىگە ھۇجۇم قىلىشتىكى ئىچكى ھەرىكەتلەندۈرگۈچى كۈچنى قوزغاتقاندا، نامراتلىقتىن قۇتۇلدۇرۇش ئۆتكىلىگە ھۇجۇم قىلىشنىڭ مۇھىم تۇتقىسىنى چىڭ تۇتقىلى بولىدۇ.

جەنۇبىي شىنجاڭغا نەزەر سالساق، كىشىلەر نامراتلىقتىن قۇتۇلۇپ بېيىش كۈچلۈك ئارزۇسىنى ئۇرغۇتۇپ، ئىلگىرىكى پاسسىپ كۈن ئۆتكۈزۈشتىن ھازىرقى تەشەببۇسكارلىق بىلەن نەتىجە يارىتىشقىچە، ئىلگىرىكى پاسسىپ ھالەتتىكى كۈتۈشتىن ھازىرقى تىرىشىپ ئەمگەك قىلىپ بېيىشقىچە «بەخت كۈرەش قىلىشتىن كېلىدۇ» دېگەن ئىدىيە بارا - بارا كىشىلەر قەلبىدىن چوڭقۇر ئورۇن ئالدى. بۇ ئىچكى ئۆزگىرىشلەر بولسىلا، جەنۇبىي شىنجاڭنىڭ ئەتىسى تېخىمۇ ئۈمىدكە تولىدۇ.