شىنجاڭ دورا ئوبوروتى جەمئىيىتى قۇرۇلدى

　تىيانشان تورى خەۋىرى(مۇخبىر جاڭ ۋەندې خەۋىرى، فوتوسى): 9-ئاينىڭ 21-كۈنى، كۇئىنلۇن مېھمانخانىسىدا شىنجاڭ دورا ئوبوروتى جەمئىيىتىنىڭ قۇرۇلغانلىقى جاكارلاندى، شىنجاڭ ئۇيغۇر ئاپتونوم رايونلۇق دورا نازارەت قىلىش-باشقۇرۇش ئىدارىسى ۋە ئاپتونوم رايونلۇق خەلق ئىشلىرى نازارىتىنىڭ رەھبەرلىرى شىنجاڭ دورا ئوبوروتى جەمئىيىتىگە ۋىۋىسكا بەردى

　　ئىگىلىنىشىچە، نۆۋەتتە شىنجاڭ بويىچە دورا توپ تارقىتىش كارخانىسىدىن 207سى بار بولۇپ، بۇنىڭ ئىچىدە ئۇنىۋېرسال توپ تارقىتىش كارخانىسىدىن 125ى؛ دورا پارچە سېتىش زەنجىرسىمان باش ئىشتابىدىن 102سى، زەنجىرسىمان دۇكاندىن 4968ى بار بولۇپ، پۈتۈن ئاپتونوم رايوندىكى 7888 پارچە سېتىش دورا دۇكىنىنىڭ تەخمىنەن %60نى ئىگىلەيدىكەن، تىجارەتتە ئىشلىتىلىۋاتقان دورىلار 15 مىڭ خىلدىن ئاشىدىكەن.

　　شىنجاڭ دورا ئوبوروتى جەمئىيىتىنىڭ تۇنجى نۆۋەتلىك جەمئىيەت باشلىقى سەي گاڭ مۇنداق دېدى: بۇ جەمئىيەتنى قۇرۇش تەييارلىق خىزمىتى 2019-يىلى 4-ئايدىن باشلانغان. تەييارلىق   مەزگىلىدە، بىز چوڭ سىناققا دۇچ كەلدۇق، ئىلگىرى-كېيىن بولۇپ يېڭى تىپتىكى تاجسىمان ۋىرۇسلۇق ئۆپكە ياللۇغى يۇقۇمىنىڭ ئالدىنى ئېلىش-تىزگىنلەش ئۈچۈن يۇقۇمنىڭ ئالدىنى ئېلىش دورىلىرى، مال مەنبەسىدىن سېتىۋېلىش، ماددىي ئەشيا زاپىسى قاتارلىق خىزمەتلەرنى ئىشلەپ، ھۆكۈمەت بىزگە تاپشۇرغان ۋەزىپىلەرنى بىر قەدەر ياخشى تاماملاپ، شىنجاڭ خەلقىنىڭ ھاياتى، ساغلاملىق بىخەتەرلىكىگە كاپالەتلىك قىلدۇق.

　　شىنجاڭ ئۇيغۇر ئاپتونوم رايونلۇق دورا نازارەت قىلىش-باشقۇرۇش ئىدارىسى پارتىيە گۇرۇپپىسىنىڭ شۇجىسى، ئىدارە باشلىقى جاڭ يۈشياڭ مۇنۇلارنى بىلدۈردى: شىنجاڭ دورا ئوبوروتى جەمئىيىتىنىڭ قۇرۇلۇشى شىنجاڭ دورا ئوبوروتى كەسپىنىڭ تەرەققىيات مۇساپىسىدىكى مۇھىم ئىش. بۇ يىل يۇقۇم يۈزبەرگەندىن بۇيان، پۈتۈن ئاپتونوم رايوندىكى دورا كارخانىلىرى داۋالاشتا ئىشلىتىلىدىغان مۇداپىئە ماددىي ئەشيالىرىنىڭ سۈپەت بىخەتەرلىكىگە كاپالەتلىك قىلىش ئاساسىدا، داۋالاشتا ئىشلىتىلىدىغان تۈرلۈك مۇداپىئە ماددىي ئەشيالىرىنى سېتىۋېلىپ ۋە بازار تەمىناتىنى زورايتىپ، ئاپتونوم رايوننىڭ يۇقۇمنىڭ ئالدىنى ئېلىش-تىزگىنلەش خىزمىتىدە غەلىبىنى قولغا كەلتۈرۈشكە پائال تۆھپە قوشتى، يەنە 10 نەچچە مىليون يۈەن قىممىتىدىكى پۇل، ماددىي بۇيۇم ئىئانە قىلىپ، ئىقتىساد، جەمئىيەت تەرەققىياتىنى ئىلگىرى سۈردى، نامرات ئائىلىلەرنى ئىشقا ئورۇنلاشتۇرۇش بويىچە 500گە يېقىن كىشىنى قوبۇل قىلىپ، نامراتلىقتىن قۇتۇلدۇرۇش ئۆتكىلىگە ھۇجۇم قىلىشقا پائال تىرىشتى.