پۇتنىڭ پېيى تارتىشىپ قالغاندا دېققەت قىلىشقا تېگىشلىك ئىشلار

　مۇسكۇل تارتىشىپ قېلىش ئادەتتە پەي تارتىشىپ قېلىش دەپمۇ ئاتىلىدۇ. بۇ بىر خىل مۇسكۇلنىڭ ئۆزلۈكىدىن قېتىپ قېلىش خاراكتېرلىك قىسقىرىشى بولۇپ، پاقالچاق ۋە پۇت بارماقلىرىدا مۇسكۇل تارتىشىپ قېلىش ئەھۋالى ئەڭ كۆپ ئۇچرايدۇ، قوزغالغاندا ئاغرىققا چىدىغىلى بولمايدۇ. ئاغرىق نەچچە سېكۇنتتىن ئون نەچچە سېكۇنتقىچە داۋاملىشىدۇ. بولۇپمۇ يېرىم كېچىدە پەي تارتىشىپ قالسا، كۆپ ھاللاردا ئادەم ئاغرىققا چىدىماي ئويغۇنۇپ كېتىدۇ.

　بەدەندە كالتسىي كەملىك، قىسمەن قان ئايلىنىش توسقۇنلۇققا ئۇچراش ياشانغانلارنىڭ پېيى تارتىشىپ قېلىشتىكى ئاساسلىق سەۋەبلەرنىڭ بىرى. پۇت بارمىقى ياكى پاقالچىقىنىڭ پېيى تارتىشىپ قالغاندا، ياشانغانلار ئالدى بىلەن بىخەتەر جاينى تېپىپ ئولتۇرۇپ، ئېغىرلىق مەركىزىنىڭ مۇقىم بولماي يىقىلىپ چۈشۈشىدىن ساقلىنىشى كېرەك. چوڭ پاقالچاقنى 90 گىرادۇس ئىگىپ، ئىككى قول بىلەن ئالدى تاپاننى ياكى پەي تارتىشىپ قالغان بىر تەرەپتىكى پۇتنىڭ چوڭ بارمىقىنى تۇتۇپ، ئۇنى قايرىپ ئۆز بەدىنىنىڭ يۆنىلىشىگە قارىتىپ، تەخمىنەن 20 سېكۇنت داۋاملاشتۇرۇپ، 2~3 قېتىم تەكرارلاپ بەرسە ھەمدە مۇسكۇللارنىڭ تارتىشىپ قېلىشىنىڭ پەسىيىش ئەھۋالىغا قاراپ قېتىم سانىنى مۇۋاپىق كۆپەيتسە بولىدۇ.

　ياشانغانلارنىڭ قان ئايلىنىشى بىر قەدەر ناچار بولغاچقا، كۆپ ساندىكىلەرنىڭ پۇتىدا قان نوكچىسى پەيدا بولۇپ، يامان ئاقىۋەت كېلىپ چىقىشتىن ساقلىنىش ئۈچۈن، خالىغانچە ئۇۋۇلاشقا بولمايدۇ.

　ياشانغانلارنىڭ پاقالچىقىنىڭ پېيى تارتىشىپ قېلىشى كۆپ بولسا، قان تومۇر مەنبەلىك كېسەللىك ئېھتىماللىقىدىن ھوشيار بولۇپ، ۋاقتىدا دوختۇرغا كۆرۈنۈشى كېرەك. ئەگەر كېسەللىك ئامىلى بولمىسا، ئىسسىق ساقلاشقا دېققەت قىلىپ، پۇت- قوللارنىڭ ياخشى قان ئايلىنىشىنى ساقلاش كېرەك. قاننىڭ ئايلىنىشى راۋان بولغاندىلا، ئاندىن ئوزۇقلۇق ماددىلار ۋە ئوكسىگېننى مۇسكۇل ھۈجەيرىلىرىگە يەتكۈزۈپ، مېتابولىزم تاشلاندۇقلىرىنى يۆتكەپ، پەي تارتىشىشنىڭ ئالدىنى ئالغىلى بولىدۇ. بۇنىڭ ئۈچۈن، ياشانغانلار دائىم مۇسكۇللارنى سوزۇش ھەرىكىتىنى ئىشلەپ بەرسە، ئاسان پەي تارتىشىپ قالىدىغان ئورۇنلارنى ئۇۋۇلاپ بەرسە، پەي تارتىشىپ قالغان ئورۇننىڭ قان ئايلىنىشىنى ئىلگىرى سۈرگىلى بولىدۇ.