شىنجاڭدىكى 3-قۇملۇق تاشيولىنىڭ قۇم ئۇلى پۈتۈن لىنىيە بويىچە تۇتاشتۇرۇلدى发表时间：2020-09-28 17:03来源：تىيانشان تورى ئانار بۇلۇت / شىنجاڭ گېزىتى خەۋىرى (مۇخبىر گو لىڭ، ياۋ لۇڭ خەۋىرى، فوتوسى): پايانسىز قۇملۇقتا، 300 كىلومېتىرغا سوزۇلغان تاشيولنىڭ «دەسلەپكى شەكلى» پەيدا بولدى. 9-ئاينىڭ 24-كۈنى، شىنجاڭدىكى تەكلىماكان قۇملۇقىنى كېسىپ ئۆتىدىغان 3-تاشيول − لوپنۇردىن چەرچەنگىچە بولغان تاشيولنىڭ قۇم ئۇلى (قۇم-بوراندا تىنىپ قالغان يول ئۇلى) پۈتۈن لىنىيە بويىچە تۇتاشتۇرۇلدى، تاشيول قۇرۇلۇشى يول يۈزى ئاساسىي قەۋىتى ۋە ئاسفالت يول يۈزىنى ياتقۇزۇش باسقۇچىغا كىرگەن بولۇپ، بۇنىڭ بىلەن، 2021-يىلى بۇ تاشيولدا ئومۇميۈزلۈك قاتناش باشلاشنىڭ ئاساسى سېلىندى.
لوپنۇر-چەرچەن تاشيولىنىڭ قۇم ئۇلى پۈتۈن لىنىيە بويىچە تۇتاشتۇرۇلدى. لوپنۇردىن چەرچەنگىچە بولغان تاشيول جۇڭگو قاتناش قۇرۇلۇشى پاي چەكلىك شىركىتى تەرىپىدىن ياسالغان بولۇپ، شىنجاڭ بايىنغولىن موڭغۇل ئاپتونوم ئوبلاستى تەۋەسىگە جايلاشقان، بۇ تۈر، شىمالدا لوپنۇر ناھىيەسىدىن باشلىنىپ، ئۆگەن دەرياسى، تارىم دەرياسى، توغراقلىق، لوپنۇرلۇقلار كەنتى، چەرچەن دەرياسىدىن ئۆتۈپ، جەنۇبتا چەرچەن ناھىيەسىگە تۇتىشىدۇ، دۆلەت يولى 315-لىنىيەسى، چاقىلىقتىن نىيەگىچە بولغان يۇقىرى سۈرئەتلىك تاشيول بىلەن ئايرىم-ئايرىم تۇتىشىدۇ، لىنىيەنىڭ ئومۇمىي ئۇزۇنلۇقى 334 كىلومېتىر، 2-دەرىجىلىك تاشيول ئۆلچىمى بويىچە ياسالغان بولۇپ، سائەتلىك سۈرئىتى 60 كىلومېتىردىن 80 كىلومېتىرغىچە قىلىپ لايىھەلەنگەن.
سۈرەتتە، لوپنۇردىن چەرچەنگىچە بولغان تاشيول قۇم ئۇلىدا قۇرۇلۇش قىلىنىۋاتماقتا. «2017-يىلى 10-ئاينىڭ 26-كۈنى، لوپنۇردىن چەرچەنگىچە بولغان تاشيول تۈرىدە رەسمىي ئىش باشلاندى. ئۈچ يىلدىن بۇيان، بىز ئادەمزات ئاياغ باسمىغان قۇملۇقتا سۇ، توك، سىگنال، يان يول قاتارلىقلار بولماسلىقتەك بىر قاتار قىيىنچىلىقلارنى يېڭىپ، 27 مىليون كۇب مېتىر قۇم-توپىنى قېزىپ تىندۇرۇشنى تاماملىدۇق، 32 ئورۇندىكى ئېگىز قۇم تاغنى تۈزلىدۇق، ئېدىرلىق ئارىسىدىكى 28 ئويمان يەرنى تىندۇردۇق، قۇملۇق رايوندا قۇم-بوراندا يىغىلىپ قالغان يول ئۇلىنى تىندۇرۇش ھالقىلىق تېخنىكىسىغا ھۇجۇم قىلىپ، پۈتۈن لىنىيەدىكى قۇم ئۇلىنىڭ مۇددەتتىن بۇرۇن تۇتاشتۇرۇلۇشىغا ھەقىقىي كاپالەتلىك قىلدۇق.» شىنجاڭ S254 لىنىيەسى لوپنۇردىن چەرچەنگىچە بولغان قۇملۇق تاشيولى تۈرىنىڭ دىرېكتورى ۋاڭ يۈنفېي مۇنداق دېدى: «نۆۋەتتە، تاشيولنىڭ ئىككى تەرىپىدىكى ئوت-چۆپ كاتەكچىسى قۇم توسۇقىنى ياساش خىزمىتىنىڭ %86ى تاماملاندى، كېيىنكى قەدەمدە، يول يۈزى ئاساسىي قەۋىتى ۋە ئاسفالت يول يۈزى ياتقۇزۇش خىزمىتى ئېلىپ بېرىلىدۇ».  سۈرەتتە، لوپنۇردىن چەرچەنگىچە بولغان تاشيول قۇم ئۇلىدا قۇرۇلۇش قىلىنىۋاتماقتا. لوپنۇردىن چەرچەنگىچە بولغان تاشيول پۈتكەندىن كېيىن، چەرچەن ناھىيەسىدىن كورلا شەھىرىگىچە بولغان مۇساپە 350 كىلومېتىر قىسقىرايدۇ، ئاپتوموبىلدا يول يۈرۈش ۋاقتى ئەسلىدىكى 12 سائەتتىن ئالتە سائەتتىن كۆپرەك ۋاقىتقا قىسقىراپ، شۇ جايدىكى ئاممىنىڭ سەپەرگە چىقىش ئارىلىقى ئۇزۇن، تۇرمۇش تەننەرخى يۇقىرى، يېزا ئىگىلىك مەھسۇلاتلىرىنى سېتىشى قىيىن بولۇش ئەھۋالى ئۈنۈملۈك ياخشىلىنىدۇ. شۇنىڭ بىلەن بىللە، بۇ لىنىيە كېسىپ ئۆتىدىغان رايون تارىم ئويمانلىقىدىكى نېفىت زاپىسى مول بولغان بەلباغ بولۇپ، دۆلەتنىڭ ئېنېرگىيە ئىستراتېگىيەسى زاپاس رايونى ھېسابلىنىدۇ، قۇملۇق تاشيولى كەلگۈسىدە نېفىت، تەبىئىي گازنى تۈكشۈرۈش، ئېچىش، توشۇش قاتارلىقلارنى كۈچلۈك تىرەك بىلەن تەمىنلەپ، جەنۇبىي شىنجاڭ رايونىنىڭ جەمئىيەت، ئىقتىساد تەرەققىياتىغا يەنىمۇ تۈرتكە بولىدۇ. |
