ئاقسۇ ۋىلايىتى: مېۋە ـ چېۋىلەرنىڭ خۇش ھىدى تارالدى، جايلاردىكى باغۋەنلەر ئۈزۈش بىلەن ئالدىراش بولۇپ

تىيانشان تورى خەۋىرى (مۇخبىر ليۇ خۇڭۋېن، ئىختىيارىي مۇخبىر جياڭ جىمىڭ خەۋىرى): ئالتۇن كۈز مەزگىلىدە، ئاقسۇ ۋىلايىتىنىڭ ھەرقايسى جايلىرىدا نەشپۈت، ياڭاق قاتارلىقلار ئارقا-ئارقىدىن پىشتى، باغۋەنلەر ئۈزۈش، سېتىش بىلەن ئالدىراش بولۇپ كەتتى.

«بۇ يىل نەشپۈتلەرنىڭ دانىسى چوڭ، تەمىمۇ ياخشى، تېخى ئۈزۈپ بولالماي تۇرۇپلا ئىچكىرىدىكى سودىگەرلەر نەشپۈت ئالىمىز دەپ سۈيلەشكە باشلىدى.» 9-ئاينىڭ 18-كۈنى، ئاقسۇ شەھىرىنىڭ بەشتۈگمەن يېزىسى يۇقارقى لەڭگەر كەنتىدىكى نەشپۈتلۈكتە نەشپۈت ئۈزۈۋاتقان باغۋەن ما يۈنفېي خۇشال ھالدا شۇنداق دېدى.

ما يۈنفېي كەنتتىكى نەشپۈت تېرىقچىلىقى چوڭ ئائىلىسى، بۇ يىل ئۇنىڭ 200 مو يەردىكى نەشپۈتىدىن مول ھوسۇل ئېلىندى، نەشپۈتلەرنىڭ شەكلى ياخشى بولۇپلا قالماي، يەنە دانىسى چوڭ بولۇپ، سودىگەرلەرنىڭ ياقتۇرۇشىغا ئېرىشتى. بۇ ۋىلايەت باغ-ئورمان تېرىقچىلىق چوڭ رايونى بولۇپ، تۈرلۈك باغ-ئورمان تېرىقچىلىق كۆلىمى 4 مىليون 500 مىڭ موغا يېتىدۇ، ئالما، نەشپۈت، ياڭاق، چىلاننى ئاساس قىلغان تۆت چوڭ مېۋىدىن باشقا، ھەرقايسى جايلار يەنە شىمېي، ئالقات، جىغان قاتارلىقلارنى تېرىدى. ھازىر، تۈرلۈك مېۋىلەر پىشىدىغان پەسىل بولۇپ، باغۋەنلەر دېھقانچىلىق ۋاقتىنى چىڭ تۇتۇپ مېۋە ئۈزدى، ساتتى.

توقسۇ ناھىيەسىنىڭ ئىچئېرىق بازىرى تۆتتاش كەنتىدىكى دېھقان مۇسا قاسىم ئائىلىسىدىكىلەر ياڭاق ئۈزۈش بىلەن ئالدىراش ئىدى. ئۇنىڭ ئائىلىسى ئىلگىرى كەنتتىكى قىيىنچىلىقى بار ئائىلە ئىدى، بۇلتۇر 15 مو يەردىكى ياڭاقتىن قىلغان كىرىمى بىلەن تۇرمۇشى زور دەرىجىدە ياخشىلاندى. «بۇ يىل ياڭاقلارنىڭ ئۆسۈشى ياخشى بولدى، مۆلچەرىمچە كىرىمىمىز بۇلتۇرقىدىن يۇقىرى بولىدۇ» دېدى مۇسا قاسىم.

مۇخبىرنىڭ ۋىلايەتلىك ئورمانچىلىق ۋە ئوتلاق ئىدارىسىدىن ئىگىلىشىچە، يېقىنقى يىللاردىن بۇيان ۋىلايەتنىڭ باغ-ئورمانچىلىقىدا سۈپەتنى ئۆستۈرۈپ ئۈنۈمنى ئاشۇرۇش قۇرۇلۇشىنىڭ يولغا قويۇلۇشىغا ئەگىشىپ، بۈگۈنكى كۈندە ۋىلايەتنىڭ باغ-ئورمانچىلىقى، بولۇپمۇ خاس باغ-ئورمانچىلىقى دېھقانلارنىڭ ئاساسلىق كىرىم مەنبەلىرىنىڭ بىرىگە ئايلىنىپ، دېھقانلارنىڭ كىشى بېشى ساپ كىرىمىنىڭ %30تىن كۆپرەكىنى ئىگىلىگەن. جايلاردىكى دېھقانلار باغ-ئورمانچىلىق ئېلىپ كەلگەن نەپنى كۆرۈپ، باغ-ئورمانلارنى تېخىمۇ ئىلمىي پەرۋىش قىلىپ، بايلىق ئەۋزەللىكىنى ئىقتىسادىي ئەۋزەللىككە ئايلاندۇرۇشنى ھەقىقىي ئىشقا ئاشۇرغان.

ئىگىلىنىشىچە، باغ-ئورمان مېۋىلىرىنىڭ ئارقا-ئارقىدىن پىشىشىغا ئەگىشىپ، ھەرقايسى جايلار باغۋەنلەرنى مېۋىلەرنى ۋاقتىدا يىغىۋېلىشقا تەشكىللىگەندىن سىرت، يەنە شىنجاڭنىڭ ئىچى-سىرتىدىن ۋىلايەتكە مېۋە سېتىۋېلىش ئۈچۈن كەلگەن سودىگەرلەر بىلەن پائال ئالاقىلاشقان. ھازىرغا قەدەر، ۋىلايەتنىڭ ھەرقايسى جايلىرىدا مېۋىسى يىغىۋېلىنغان باغ-ئورمان كۆلىمى 1 مىليون 709 مىڭ 700 مو بولۇپ، يىغىۋېلىش مىقدارى 785 مىڭ 300 توننىغا يەتكەن.