ئاپتونوم رايونىمىزدىكى جايلار، تارماقلار تور ۋە ئەمەلىيەتتە تەشۋىقات پائالىيىتىنى پائال قانات يايدۇ

ئالتۇن كۈز پەسلىدە، ئاپتونوم رايونىمىزدىكى جايلار، تارماقلار تور ۋە ئەمەلىيەتتە تەشۋىقات پائالىيىتىنى پائال قانات يايدۇرۇپ، كۈز، قىش پەسىللىك ساياھەت مەھسۇلاتلىرى ۋە ئېتىبار بېرىش تەدبىرلىرىنى كەڭ تونۇشتۇرۇپ، ھەر تەرەپتىن كەلگەن ساياھەتچىلەرنى جەلپ قىلىپ، ساياھەتچىلىكنىڭ ئومۇميۈزلۈك ئەسلىگە كېلىشىنى تېز ئىلگىرى سۈردى.

　مىڭ چاقىرىملىق مۇساپىنى ھالقىغان، شىنجاڭدىكى 8 چوڭ مەنزىرە رايونىنى ئۆز ئىچىگە ئالغان ھەمتۈرتكە بولۇپ بىۋاسىتە كۆرسىتىش پائالىيىتى-- شىنجاڭدىكى كۈز مەنزىرىسى ئەڭ گۈزەل 8 جايدا 12 سائەت ئاستا بىۋاستە كۆرسىتىش پائالىيىتى مۇشۇ ئاينىڭ 25- كۈنى ئۆتكۈزۈلدى. باغراش كۆلىدىكى ئىللىق ئاپتاپتىن قاناستىكى رەڭگارەڭ مەنزىرىگىچە، بايىنبۇلاقتىكى 9 ئايلانما، 18 ئەگىمدىن قاراجۈن يايلىقىدىكى چارۋىچىلار ناخشىسىغىچە، نۇرغۇن تورداش بىۋاستە كۆرسىتىلگەن كۆرۈنۈشلەر ئارقىلىق تيانشاننىڭ جەنۇبى ۋە شىمالىدىكى گۈزەل كۈز مەنزىرىلەردىن ھۇزۇرلاندى. ئاپتونوم رايونلۇق مەدەنىيەت ۋە ساياھەت نازارىتى ساياھەت تەشۋىقاتىنى ئومۇملاشتۇرۇش مەركىزىنىڭ مۇدىرى لى مېڭ مۇنداق دېدى: مەركىزىي تېلېۋىزىيە ئىستانسىسىنىڭ سىن كۆرۈنۈشى، «كۈەيشۇ»، «دوۋيىن» قاتارلىق نۇرغۇن تور سۇپىلىرى بىلەن بىرلىشىپ ماس قەدەمدە كۆرسىتىپ، شىنجاڭنىڭ ئالتۇن كۈز پەسلىدىكى تەبىئىي مەنزىرىسىنى تولۇق نامايان قىلىپ، مەملىكەتنىڭ ھەرقايسى جايلىرىدىكى ساياھەتچىلەرنى شىنجاڭنى بۇلۇت سۇپىسىدا تاماشا قىلىش ئىمكانىيىتىگە ئىگە قىلدۇق. ھازىرغا قەدەر، توردا بىۋاسىتە كۆرگەن ۋە قايتا كۆرگەنلەرنىڭ سانى 18 مىليون 200 مىڭ ئادەم قېتىمدىن ئاشتى.

　ئاپتونوم رايونىمىزدىكى بارلىق دالا مەنزىرە رايونلىرى ۋە مەنزىرە نۇقتىلىرى مۇشۇ ئاينىڭ بېشىدىن باشلاپ ئارقا- ئارقىدىن ئېچىۋېتىلدى، ئاپتونوم رايونىمىز ئىچى ساياھىتى، ئۆلكە ئاتلاپ ساياھەت قىلىش، كوللېكتىپ ساياھەت قىلىش ماس قەدەمدە ئەسلىگە كەلدى. جايلار، مەنزىرە رايونلىرى شىنجاڭ كۈزلۈك، قىشلىق ساياھەتچىلىكىنىڭ ئۈزلۈكسىز جانلىنىشىنى سىجىل ئىلگىرى سۈرۈش ئۈچۈن، بەس- بەستە يېڭى تاراتقۇ سۇپىسىدىن پايدىلىنىپ، كۈزلۈك، قىشلىق ساياھەت بايلىقى ۋە ساياھەت لىنىيەسى، مەھسۇلاتلىرىنى پائال تەشۋىق قىلىپ ۋە تونۇشتۇرۇپ، مەملىكەتنىڭ ھەر قايسى جايلىرىدىكى ساياھەتچىلەرنى ساياھەت قىلىشقا جەلپ قىلدى. مۇشۇ ئاينىڭ 22- كۈنى «شىنجاڭ ياخشى جاي-- تالانت ئىگىسى غەرب ساياھىتىنىڭ 9- پەسلى» تېمىسىدىكى توردا تارقىتىش پائالىيىتى تيانشان بوغدا كۆلى مەنزىرە رايونىدا باشلاندى. بۇ پائالىيەتكە مەملىكەتنىڭ ھەر قايسى جايلىرىدىن كەلگەن 40 نەچچە تاراتقۇ مۇخبىرى، شىنجاڭنىڭ ئىچى- سىرتىدىن كەلگەن ساياھەت تالانت ئىگىلىرى تەكلىپ قىلىنىپ، جەنۇبىي ۋە شىمالىي شىنجاڭغا كېلىپ نەق مەيداندا زىيارەت قىلىپ، بىۋاستە ھىس قىلدى ھەمدە كۆپ خىل تاراتقۇ سۇپىسىدا گۈزەل شىنجاڭنى تونۇشتۇردى. ساياھەت تالانت ئىگىسى فاڭ دەندەننىڭ يېڭى تاراتقۇ سۇپىسىدا 3 مىليوندىن ئارتۇق ئەگەشكۈچىسى بولۇپ، بۇ ئۇنىڭ 2- قېتىم «تالانت ئىگىسىنىڭ غەرىب ساياھىتى» پائالىيىتىگە قاتنىشىشى. ئۇ مۇنداق دېدى: كامېرا ئارقىلىق بۇ گۈزەل جايلارنى خاتىرىلەپ، كۆپچىلىككە سۇنىمەن، تېخىمۇ كۆپ كىشىنىڭ شىنجاڭغا كېلىپ، بۇ گۈزەل جاينى كۆرۈشىنى ئۈمىد قىلىمەن.

　ئاپتونوم رايونىمىزدىكى جايلار يەنە بەس- بەستە «سىرتقا چىقىرىش» شەكلىدە، ئىچكىرى رايوندىكى ئۆلكە، ئاپتونوم رايون، بىۋاسىتە قاراشلىق شەھەرلەرنىڭ ئاساسلىق ساياھەتچى مەنبەسى بولغان جايلار، شىنجاڭغا نىشانلىق ياردەم بېرىۋاتقان ئۆلكە، شەھەرلەرگە بېرىپ، كۈزلۈك، قىشلىق ساياھەتنى تونۇشتۇرۇش پائالىيىتىنى قانات يايدۇردى. ئالتاي ۋىلايىتى يېقىندا، 16 ساياھەتچىلىكنى تونۇشتۇرۇش گۇرۇپپىسى تەشكىللەپ، بوخەي دېڭىزى، چاڭجياڭ دېلتىسى، جۇجياڭ دېلتىسى قاتارلىق ئاساسلىق ساياھەتچى مەنبەسى بولغان 32 شەھەرگە بېرىپ، «مۇنبەت تۇپراق قاناس-- قار يۇرتى ئالتاي» تېمىسىدا كۈزلۈك، قىشلىق ساياھەت لىنىيەسى مەھسۇلاتلىرىنى تەشۋىق قىلىپ ۋە تونۇشتۇرۇپ، ياخشى ئۈنۈمگە ئېرىشتى. ئالتاي ۋىلايەتلىك مەدەنىيەت- تەنتەربىيە- رادىيو- تېلېۋىزىيە ۋە ساياھەت ئىدارىسى تەشۋىقاتنى ئومۇملاشتۇرۇش مەركىزىنىڭ مۇئاۋىن مۇدىرى سۈي خاڭرۈي مۇنداق دېدى: تەشۋىق پائالىيىتىمىز شۇ جايدا ساياھەتكە چېتىلىدىغان كارخانىلار ۋە ھەر قايسى چوڭ ئاساسلىق تاراتقۇلارنىڭ دىققىتىنى تارتتى، نەق مەيداندا ئىمزالانغان رامكا كېلىشىمى 100 گە يەتتى. كېيىنكى مەزگىلدە ئالتاي ۋىلايىتىمىزگە مىليون ساياھەتچى كىلىشى مۇمكىن.

　ئاپتونوم رايونلۇق مەدەنىيەت ۋە ساياھەت تارماقلىرى نۆۋەتتە، ئىلگىرى- كېيىن بولۇپ «شىنجاڭ ياخشى جاي-- مەن شىنجاڭدا سىزنى كۈتىمەن»، «دۇنيانىڭ گۈزەللىكى، شىنجاڭغا مۇجەسسەملەنگەن»، «شىنجاڭغا مۇھەببەت باغلاپ ساياھەت قىلىش» قاتارلىق كۆپ خىل ئالاقە تورىدا سېتىشنى كېڭەيتىش پائالىيەتلىرىنى ئۆتكۈزدى. بۇنىڭ بىلەن، توردا تارقىتىلىش سانى 1 مىليارد 430 مىليون قېتىمغا، تېما مۇزاكىرە سانى 180 مىليون ئادەم قېتىمغا يەتتى. مەركىزى كومىتېت تەشۋىقات بۆلۈمى، مەدەنىيەت ۋە ساياھەت مىنىستىرلىقى مۇشۇ ئاينىڭ 29- كۈنى، يەنە شىنجاڭدا «قەلبتىكى تۆت پەسىل، گۈزەل جۇڭگو» مەملىكەتلىك كۈز، قىش پەسىللىك ۋە «شىنجاڭ ياخشى جاي» تەشۋىقاتىنى كېڭەيتىش پائالىيىتى ئۆتكۈزۈپ، مەملىكەتنىڭ ھەرقايسى جايلىرىدىكى ساياھەتچىلەرنىڭ دىققىتىنى يەنە بىر قېتىم شىنجاڭغا مەركەزلەشتۈرمەكچى بولدى.