ساۋەن ناھىيەسى ياخشى ئېكولوگىيەلىك مۇھىتقا تايىنىپ، ئۆزگىچە سۇ مەھسۇلاتلىرى باقمىچىلىقىنى زور كۈچ بى

　ساۋەن ناھىيەسى ياخشى ئېكولوگىيەلىك مۇھىتقا تايىنىپ، ئۆزگىچە سۇ مەھسۇلاتلىرى باقمىچىلىقىنى زور كۈچ بىلەن تەرەققىي قىلدۇرۇپ، دېھقانلارنىڭ كىرىمىنى ئاشۇرۇپ بېيىشىنىڭ يېڭى يولىنى ئاچتى.

　 ئىككى كۈندىن بۇيان، ساۋەن ناھىيەسىنىڭ راك، قىسقۇچپاقا، بېلىق قاتارلىق ئالاھىدە سۇ مەھسۇلاتلىرى ئارقا- ئارقىدىن بازارغا سېلىندى. باقمىچىلار دۆلەت بايرىمى، جۇڭچيۇ بايرىمىدىن ئىبارەت «قوش بايرام» دىكى ئىستېمال قىزغىنلىقىدىن پايدىلىنىپ، تور يىغىش بىلەن ئالدىراش بولۇپ كەتتى. بىر تۈركۈم يېڭى سۇ مەھسۇلاتلىرى بايراملىق ئىستېمال بازىرىدىكى ئاساسلىق تاۋارغا ئايلاندى. ساۋەن ناھىيە «چيەنچۈەنخۇ» سۇ مەھسۇلاتلىرى باقمىچىلىق بازىسىدا، باقمىچى ليۇ ئەييۈن جەنۇبىي ئامېرىكا ئاق پراۋن راكىنى تۇتۇش بىلەن ئالدىراش ئىدى. ئۇ، باش بارماق توملىقىدىكى چوڭ راكلارغا قاراپ مۇنداق دېدى: بۇ يىل يەنە مول ھوسۇللۇق يىل بولدى. بىز ھەر كۈنى ئەتىگەن سائەت يەتتىدىن ئاشقاندا كۆلگە تور تاشلايمىز. ھەر كۈنى ئون نەچچە قېتىم تاشلاپ، بىر كۈندە تۆت، بەش يۈز كىلوگرام راك تۇتىمىز. بۇ يىل كۆلگە 2 مىليون راك بېلىجىنى قويۇپ بەرگەن. ھازىرقى ئەھۋالدىن قارىغاندا راكنىڭ يېتىلىش نىسبىتى خېلى يامان ئەمەس. بىز راكلارنى ئاساسلىقى ساۋەننىڭ سۇ مەھسۇلاتلىرى دۇكانلىرىغا ساتىمىز.

　 ساۋەن ناھىيەسى بۇ بىر نەچچە يىلدا، چيەنچۈەنخۇ دۆلەت سۇلۇق يەر باغچىسىنىڭ ئەلا سۈپەتلىك سۇ بايلىقىغا تايىنىپ، ئىلگىرى- كېيىن بولۇپ جەنۇبىي ئامېرىكا ئاق پراۋن راكى، جۇڭخۇا تىۋىتلىق قىسقۇچپاقىسى، ئالا چورتان بېلىقى قاتارلىق ئۆزگىچە سۇ مەھسۇلاتلىرىنى كىرگۈزۈپ، ئۆزگىچە سۇ مەھسۇلاتلىرى باقمىچىلىق بازىسىنى داۋاملىق بەرپا قىلدى. ئالتۇن كۈز پەسلىدە، ساۋەن ناھىيە ليۇشۇگۇ سۇ ئامبىرىدىكى سۇ مەھسۇلاتلىرى باقمىچىسى ليۇ چىڭشىننىڭ قىسقۇچپاقىسى بازارغا سېلىندى. ليۇ چىڭشىن سېمىز قىسقۇچپاقىلارغا قاراپ مۇنداق دېدى: مەن بۇ يىل 3- ئاينىڭ ئاخىرىدا شەرقىي شىمالدىكى پەنجىن شەھىرىدىن تەخمىنەن 40 توننا قىسقۇچپاقا بالىسى كىرگۈزۈپ، سۇغا قويۇپ بەرگەن ئىدىم. ھازىر بۇلار تۇتقۇدەك بولدى. دېھقانلار كالىندارى بويىچە 8- ئاينىڭ 15- كۈنىنىڭ ئالدى كەينىدە بىر كۈندە يۈز كىلوگىرامدىن 200 كىلوگىرامغىچە ساتقىلى بولىدۇ.

　 ئىگىلىنىشىچە، نۆۋەتتە ساۋەن ناھىيەسىنىڭ سۇ مەھسۇلاتلىرى باقمىچىلىق كۆلىمى 10 مىڭ مودىن ئېشىپ، 10 مىليون يۈەندىن ئارتۇق ئىقتىسادىي ئۈنۈم يارىتىلغان. ئۆزگىچە سۇ مەھسۇلاتلىرى باقمىچىلىقى ساۋەن دېھقانلىرىنىڭ «سۇ يولى» دا مېڭىپ، ھاللىق سەۋىيەگە يېتىشىدىكى يېڭى يولى بولۇپ قالغان.