新闻详情

چېمپىيونلۇق بىرلەشمىسى: مانچېستېر بىرلەشمىسى 0:5 لېيپزېگ قىزىل كالا

发表时间:2020-10-29 14:42作者:ئەلكۈيى تورى来源:تېڭشۈن تورى


بېيجىڭ ۋاقتى 10-ئاينىڭ 29-كۈنى سەھەر سائەت 4:00تە، 2020/2021-يىللىق مۇسابىقە پەسلى ياۋروپا چېمپىيونلۇق بىرلەشمىسى گۇرۇپپا باسقۇچىنىڭ ئىككىنچى ئايلانمىسىدىكى بىر مەيدان مۇسابىقە كونا تراففورد توپ مەيدانىدا ئۆتكۈزۈلدى، مانچېستېر بىرلەشمىسى ساھىبخان مەيداندا لېيپزېگ قىزىل كالا بىلەن مۇسابىقىگە چۈشتى، ئالدىنقى يېرىم مەيدان مۇسابىقىدە مانچېستېر بىرلەشمىسىدىن پوگبانىڭ ياردەم پاس بېرىشى بىلەن گرېنۋود بىر توپ كىرگۈزۈپ مەيدان نەتىجىسىدە ئۈستۈنلۈكنى قولغا كەلتۈردى، ئالدىنقى يېرىم مەيدان مۇسابىقە مانچېستېر بىرلەشمىسىنىڭ بىر توپ ئۈستۈنلۈكتە تۇرۇشى بىلەن ئاخىرلاشتى، كېيىنكى يېرىم مەيدان مۇسابىقىدە مانچېستېر بىرلەشمىسىدىن زاپاس ئەزالار قاتارىدا مەيدانغا چۈشكەن راشفورد 18 مىنۇت ئىچىدە ئۈچ توپ كىرگۈزۈپ، قالپاق ئويۇنى ئوينىدى، مۇسابىقە ئاخىرلىشىش باسقۇچىدا مارشال نۇقتا توپتىن بىرنى كىرگۈزۈپ، نومۇر پەرقىنى تېخىمۇ چوڭايتتى، كېيىنكى مىنۇتلاردا مەيدان نەتىجىسىدە ھېچقانداق ئۆزگىرىش بولمىدى، ئاخىرىدا مانچېستېر بىرلەشمىسى ساھىبخان مەيداندا 0:5 نەتىجىدە، چوڭ نومۇر پەرقى بىلەن لېيپزېگ قىزىل كالا كوماندىسىنى مەغلۇپ قىلدى.

مۇسابىقە باشلىنىپلا ساھىبخان مەيداندىكى مانچېستېر بىرلەشمىسى ئالدى بىلەن ھۇجۇمغا ئۆتتى، فرېدنىڭ تەپكەن توپىنى قاپقىچى توسۇپ چىقىرىۋەتتى، مارشالنىڭ يەتكۈزگەن پاس توپىغا گرېنۋود يېتىشەلمەي قالدى، مۇسابىقە باشلىنىپ 20 مىنۇت بولغاندا مانچېستېر بىرلەشمىسى بىر توپ كىرگۈزۈپ، مەيدان نەتىجىسىدە ئۈستۈنلۈكنى قولغا كەلتۈردى، مانچېستېر بىرلەشمىسى ھۇجۇم تەشكىللەپ، پوگبانىڭ ئۇدۇل پاس بېرىشى بىلەن گرېنۋود چەكلەنگەن رايون ئىچىدە سول تەرەپتىن توپنى قاپقىغا تېپىپ كىرگۈزدى، لېيپزېگ قىزىل كالا ھۇجۇم تەشكىللەپ، ئىنكۇنكۇنىڭ تەپكەن توپىنى قاپقىچى توسۇپ چىقىرىۋەتتى، ئانگىلىنونىڭ تەپكەن توپىنى مۇداپىئەچى توسۇۋالدى، ئالدىنقى يېرىم مەيدان مۇسابىقە مانچېستېر بىرلەشمىسىنىڭ بىر توپ ئۈستۈنلۈكتە تۇرۇشى بىلەن ئاخىرلاشتى.

كېيىنكى يېرىم مەيدان مۇسابىقە باشلىنىشتا ھەر ئىككى كوماندا بىر-بىرىدىن قېلىشماي قاتتىق تىركەشتى، مانچېستېر بىرلەشمىسىدىن ۋاندېبېك ياخشى پۇرسەتنى قولدىن بەردى، لېيپزېگ قىزىل كالىدىن كونېتنىڭ ئۈسكەن كاللا توپىنى قاپقىچى توسۇپ چىقىرىۋەتتى، مۇسابىقە باشلىنىپ 73 مىنۇت بولغاندا، مانچېستېر بىرلەشمىسى يەنە بىر توپ كىرگۈزۈپ، نومۇر پەرقىنى چوڭايتتى، مانچېستېر بىرلەشمىسى ھۇجۇم تەشكىللەپ، برۇنۇ فېرناندېسىنىڭ ئۇزۇن پاس بېرىشى بىلەن راشفورد يەكمۇيەك ھالەتتە چەكلەنگەن رايون ئىچىگە بۆسۈپ كىرىپ توپنى قاپقىغا تېپىپ كىرگۈزدى، ئارىدىن تۆت مىنۇت ئۆتكەندە مانچېستېر بىرلەشمىسى ھۇجۇم تەشكىللەپ، راشفورد چەكلەنگەن رايون سىرتىدا توپ تارتىۋىلىپ، يەنە بىر قېتىم يەكمۇيەك شارائىتتا توپنى قاپقىغا تېپىپ كىرگۈزدى، مۇسابىقە داۋاملىشىپ 86 مىنۇتقا قەدەم قويغاندا، مانچېستېر بىرلەشمىسى يەنە بىر توپ كىرگۈزۈپ، مۇسابىقە غەلبىسىنى مۇددەتتىن بۇرۇن مۇقىمىلىدى، مانچېستېر بىرلەشمىسى ھۇجۇم تەشكىللەپ، مارشال نۇقتا توپتىن بىرنى قولغا كەلتۈرۈپ، ئۆزى نۇقتا توپنى تېپىپ كىرگۈزدى، ئارىدىن ئىككى مىنۇت ئۆتكەندە مانچېستېر بىرلەشمىسىدىن كاۋانى بىر توپ كىرگۈزگەن بولسىمۇ، ئەمما رىپېر تەرىپىدىن ئىناۋەتسىز قىلىندى، مۇسابىقە ئاخىرلىشىش باسقۇچىغا قەدەم قويغاندا مانچېستېر بىرلەشمىسىدىن راشفورد، مارشال يەتكۈزگەن پاس توپقا تايىنىپ، توپنى قاپقىغا تېپىپ كىرگۈزدى، كېيىنكى مىنۇتلاردا مەيدان نەتىجىسىدە ھېچقانداق ئۆزگىرىش بولمىدى، ئاخىرىدا مانچېستېر بىرلەشمىسى ساھىبخان مەيداندا 0:5 نەتىجىدە، لېيپزېگ قىزىل كالا كوماندىسىنى مەغلۇپ قىلدى.


分享到: